Свята і ўзнагароды з яго нагоды
Паколькі ўсе работнікі Глускай ПМК-249, як зазначыў яе дырэктар Віктар Кісялевіч, выступаюць за здаровы лад жыцця, то прэміі з нагоды прафесійнага свята было вырашана выдаць разам з заработнай платай. Іх памер вагаецца ад адной да чатырох базавых велічынь і залежыць ад стажу работы ў арганізацыі. Не абыдзены ўвагай і матэрыяльнай падтрымкай і будаўнікі-пенсіянеры. У сваім прывітальным слове падчас урачыстага сходу Віктар Кісялевіч павіншаваў калег і запэўніў, што цяжкасці, якія зараз адчувае арганізацыя, часовыя, што ў хуткім часе з’явяцца новыя аб’екты. А што да ўзнагарод, якія былі ўручаны ва ўрачыстай абстаноўцы, то нашы будаўнікі заслужылі іх сваім прафесіяналізмам і стараннай працай. Граматай Магілёўскага аблсельбуда ўзнагароджана вядучы інжынер па арганізацыі і нарміраванні працы Валянціна Васілеўская і вадзіцель аўтамабіля Яўген Валодзін. Граматы адміністрацыі ДУКДБП “Глуская ПМК-249” былі ўручаны начальніку ўчастка агульнабудаўнічых работ Андрэю Кандрацюку, вадзіцелю аўтобуса Віталю Дарошку, муляру Генадзю Кісялевічу, электрагазазваршчыку Мікалаю Жартуну, вадзіцелю аўтамабіля Мікалаю Голубу. За добра-сумленнае выкананне сваіх працоўных абавязкаў падзякі адміністрацыі ПМК-249 атрымалі машыніст аўтамабільнага крана Іван Кошан і муляр Аляксандр Гурын.
Высокіх паказчыкаў у працы і новых будоўляў пажадаў калектыву ПМК-249 старшыня райкама прафсаюза работнікаў аграпра-мысловага комплексу Віталь Рагалевіч. У яго таксама была прыемная місія ўручыць будаўнікам раёна заслужаныя ўзнагароды, і першая з іх — начальніку ПМК-249 Віктару Кісялевічу — падзяка за добрасумленнае выкананне працоўных абавязкаў, а таксама ў сувязі з 25-годдзем работы ў арганізацыі і прысваеннем звання “Ветэран ПМК-249”. Грамату Магілёўскага абласнога прафсаюза работнікаў АПК атрымаў вадзіцель Мікалай Парахаўнік, граматай Глускага райкама прафсаюза работнікаў аграпрамысловага комплексу ўзнагароджаны электрамантажнік Сяргей Кісялевіч.
Калі граматы, падзякі і прадугледжанае да іх матэрыяльнае заахвочванне атрымалі толькі асобныя члены працоўнага калектыву, то музычныя падарункі і цёплыя віншавальныя словы артысты раённага Дома культуры адрасавалі ўсім будаўнікам арганізацыі з нагоды іх прафесійнага свята. Канцэрт атрымаўся вясёлым, цёплым, шчырым. Якраз такім, каб можна было адпачыць душой і адчуць сапраўдны святочны настрой.
Т. ЛУКАШЭВІЧ
Фота С. РУДЗІНСКАГА