Ведаеце, вельмі прыемна, калі ў рэдакцыйнай пошце з’яўляюцца лісты з просьбай расказаць і падзячыць добраму чалавеку. Так было і ў гэты раз, калі мы атрымалі пісьмо ад калег — з рэдакцыі рэспубліканскай газеты “Звязда”. 

Справа ў тым, што ў нашым Глускім раёне, у Бабірове, жыве адна жанчына, Тамара Міхайлаўна Свірыда. Родам яна з суседняга Старадарожскага раёна, з вёскі Падарэссе, каля якой на пачатку вайны немцы збілі савецкі самалёт. Пазаштатны карэспандэнт газеты “Звязда” і жыхары Падарэсся праз 74 гады змаглі ўстанавіць месца падзення самалёта і імёны загінуўшых членаў экіпажа. У пошуках актыўна дапамагала і Тамара Свірыда, якой добра знаёма гэта гісторыя: тады, у 1941 годзе, маці Тамары Міхайлаўны разам са сваёй сястрой знайшлі ў кабіне збітага самалёта абгарэлы планшэт з ініцыяламі. “Свірыда Тамара Міхайлаўна неаднаразова выязджала ў Старадарожскі раён для ўстанаўлення месца падзення самалёта. Дзякуючы яе ўпартасці, а таксама намаганням бабруйскага пошукавага атрада “Абеліск” і было ўстаноўлена дакладнае месца гібелі экіпажа, — гаворыцца ў лісце, падпісаным першым намеснікам галоўнага рэдактара газеты “Звязда” Наталляй Карпенкай, а далей ідзе працяг: — Ад імя рэдакцыі газеты “Звязда” і сваякоў загінулых лётчыкаў просім праз вашу газету перадаць Свірыдзе Тамары Міхайлаўне шчырую падзяку за дапамогу”.