Узбраенне і ваенная тэхніка перыяду Вялікай Айчыннай вайны, драўляныя фігуркі салдат розных армій і розных часоў сабраны разам у адной экспазіцыі, што адкрылася днямі ў раённым краязнаўчым музеі. Тут праходзіць выстава разьбяра па дрэве Ігара Лізуры. Ураджэнец Асіповіцкага раёна, а цяпер жыхар Старых Дарог, сваю вялікую калекцыю работ ён перадаў Асіповіцкаму гісторыка-краязнаўчаму музею, адкуль яны і трапілі ў Глуск, дзе экспазіцыя затрымаецца прыкладна да сярэдзіны кастрычніка. Калі сабраць усе фігуркі рыцараў, грэнадзёраў, гусараў, асілкаў, дружыннікаў, самураяў, мангольскіх воінаў і вікінгаў — атрымаецца цэлая драўляная армія. Усяго ж у мясцовым музеі выстаўляецца больш за 50 экспанатаў, многія з іх былі выразаны з суцэльных кавалкаў дрэва, прычым у вырабах да драбніц прапрацаваны ўсе дэталі адзення, зброі, тэхнікі, ёсць нават цэлыя кампазіцыі, напрыклад, партызанскі лагер у лесе. Думаецца, тым, хто цікавіцца і разьбой па дрэве, і ўсім, што звязана з ваеннай тэматыкай, новая музейная экспазіцыя пад назвай “Лінія Лізуры” спадабаецца — цікава паглядзець, карысна даведацца.

Т.ЛУГАВАЯ
Фота С.РУДЗІНСКАГА