Раённы этап рэспубліканскага творчага конкурсу юных чытальнікаў “Жывая класіка”, які адбыўся 20 красавіка, у гэтым годзе сабраў нечакана шмат удзельнікаў — 49. Яны выступалі ў чатырох узроставых групах, і нельга вылучыць самую актыўную, бо ў кожнай колькасць канкурсантаў была прыкладна аднолькавай (плюс-мінус адзін-два чалавекі).

Дэвізам конкурсу былі абраны словы “Чытаем разам, ствараем сябе і краіну!”, а яго ўдзельнікі павінны былі прадставіць на суд журы чытанне верша або празаічнага ўрыўка беларускіх або рускіх аўтараў. Адзначу, што творы гучалі самыя разнастайныя, як у жанравых адносінах, так і па тэматыцы. Дарэчы, гэта быў адзін з крытэрыяў ацэньвання — адпаведнасць выбранага рэпертуару ўзросту выканаўцы. Канкурсанты чыталі вершы і прозу класікаў і сучасных пісьменнікаў (у тым ліку глушчанкі Валянціны Хлань), і я, напрыклад, дзякуючы гэтаму адкрыла для сябе некаторыя новыя цікавыя імёны.

Колькі слоў скажу пра журы. У яго ўвайшлі прадстаўнікі раённага аддзела адукацыі, спорту і турызму Ігар Сушчэня, Ніна Беразоўская, Таццяна Грыгор’ева, Наталля Някрасава і дырэктар Цэнтра творчасці Глуска Алена Самуйлік. Для ацэнкі выступленняў браліся пад увагу непасрэдна тэхніка чытання (каб было ўсё ў парадку з дыкцыяй, інтанацыяй, вымаўленнем гукаў), а таксама выканаўчае майстэрства,  сцэнічная культура, артыстызм, глыбіня пагружэння ў вобраз і агульнае ўражанне, якое рабіў чытальнік на залу, на гледачоў і, у прыватнасці, на чле-наў журы. На жаль, я не змагла пабачыць выступленні канкурсантаў цалкам, толькі асобныя відэазапісы, але і па іх мяркую, што выбіраць лепшых было не вельмі проста. Таму, мабыць, акрамя прысуджэння прызавых месцаў, журы вырашыла адзначыць даволі вялікую колькасць выканаўцаў заахвочвальнымі дыпломамі. Іх атрымалі гімназісты Паліна Ермакова (4-ы клас) і Яўгенія Нікіціна (8-ы клас), вучні сярэдняй школы № 1 імя Сяргея Грахоўскага Мікіта Леўчанка (2-і клас), Амані Алхаціб (5-ы клас) і Ганна Ляпко (9-ы клас), прад-стаўнікі сярэдняй школы № 2 Ілья Дзідух (1-ы клас), Мікіта Маскаленка (5-ы клас), Ангеліна Хурсанава (10-ы клас), а таксама трэцякласніца Усцярхоўскай школы Лізавета Лёзава.

Ну і, нарэшце, пераможцы. Сярод вучняў першых — чацвёртых класаў дыпломам трэцяй ступені ўзнагароджана Дар’я Урбанская (СШ № 1, 4-ы клас), дыпломам другой ступені — Яна Чарніцына (СШ № 2, 3-і клас). Першае месца падзялілі трэцякласніца сярэдняй школы № 2 Ксенія Пракоф’ева, якая вельмі выразна перадала вобразы персанажаў з байкі Івана Крылова “Страказа і муравей”, і другакласнік сярэдняй школы № 1 Ілья Васілеўскі, які надзвычай артыстычна прачытаў байку “Варона і лісіца” таго ж аўтара.

Ва ўзроставай групе пяты — шосты класы дыплом трэцяй ступені атрымала Дар’я Сарапас (СШ № 2, 6-ы клас), другой ступені — шасцікласнік Заеліц-кай школы Кірыл Лапуцька. Першае месца журы аддало вучані-цы 6-га класа Глускай санаторнай школы Яне Пацкевіч. Верш сучаснай расійскай паэткі Людмілы Каралёвай “Носите на руках детей” у выкананні Яны гучаў вельмі кранальна.

Сярод вучняў сёмых — восьмых класаў трэцяе месца дасталася Івану Алёхну, вучню Заеліцкай школы, дыпломамі другой ступені ўзнагароджаны Крысціна Лапцева з Усцярхоўскай і Таццяна Сапега і Канстанцін Лугін з Клятнянскай школ, усе яны васьмікласнікі. Першае месца заняў Павел Статкевіч, вучань 7-га класа гімназіі, які вельмі эмацыянальна і выразна перадаў змест верша Кандрата Крапівы “Янка і Карла”.

Дыпломам трэцяй ступені ў старэйшай узроставай групе, дзявяты — дзясяты класы, узнагароджана Валерыя Хлань (гімназія, 9-ы клас). Другое месца — у дзесяцікласніцы гімназіі Яўгеніі Кудзелкі, якая выбрала для чытання ўрывак з аповесці “Мястэчка… Мястэчка…” Сяргея Грахоўскага, дзе расказваецца пра жніво, і падчас свайго выступлення нават спявала. Першае месца заняла дзесяцікласніца Наталля Сыцька з Завалочыцкай школы, яна прачытала баладу Вольгі Кіеўскай “Сорок первый — год потерь и страха”.

Аксана ВАСІЛЕЎСКАЯ

Фота Сяргея РУДЗІНСКАГА