Кожная пара года прыходзіць у свой час, і з кожнай парой у нас звязаны свае ўражанні: так, за летам заўсёды ідзе восень, а пасля канікулаў заўсёды пачынаецца вучоба — урокі, задачы, дыктоўкі, заданні. Гэты тыдзень для больш як паўтары тысячы школьнікаў Глускага раёна пачаўся ўрачыстымі лінейкамі, прысвечанымі святу Першага званка, былі сустрэчы, кветкі, прывітанні і ўсмешкі — у кожнай школе, у кожным класе. Гэта адзначыў і старшыня Глускага раённага выканаўчага камітэта Юрый Дымша, пабываўшы ў школе № 2, прайшоўшы па абноўленых калідорах, светлых кабінетах. Аднак разам з радасцю ў вачах школьнікаў чыталіся і крыху сумныя ноткі, гэта шкадаванне ад таго, што так хутка скончылася лета, што менш стане вольнага часу з-за ўрокаў і дамашніх заданняў. Такія пачуцці знаёмы кожнаму чалавеку, таму дарослыя пастараліся, каб умовы для дзяцей у школах былі больш камфортнымі. Асабліва шмат у гэтым плане зроблена ў школе № 2, добраўпарадкаваны двор стаў месцам правядзення святочных лінеек, прыгажэй выглядае фасад будынка, больш цёпла будзе ў школе зімой, бо па праграме энергазберажэння пачалася замена вокнаў на шклопакеты, работы будуць прадоўжаны, раённая ўлада і калектыў школы, па словах старшыні выканкама, давядуць пачатае да канца, ад дзяцей жа патрабуецца адно: старанна вучыцца, добра паводзіць сябе, быць актыўнымі адкрывальнікамі новага і цікавага. Умовы ёсць, трэба толькі не ленавацца. Зрэшты, многія школьнікі праявілі сябе іменна так ужо гэтым летам: працавалі ў будаўнічых атрадах, зрабілі ў школьным двары новую хакейную каробку, прымалі ўдзел ва ўборцы ўраджаю. Шэфы, ПМК-249 і ПМК-86 “Водбуд”, адзначылі такі працоўны парыў юнага пакалення і падарылі школе агучвальную апаратуру, каб усе святы праходзілі тут цікава, на добрым арганізацыйным і тэхнічным узроўні. Гэтаму ж будзе спрыяць і падарунак раённага выканаўчага камітэта — наўтбук. Салодкімі прызамі праўленне СВК “Дружба” падтрымала школьную футбольную каманду. Такая ўвага да праблем адной са старэйшых школ раёна выклікае як глыбокую павагу, так і шчырую падзяку: ад імя ўсяго калектыву дырэктар школы Святлана Лісіца ўручыла падзячныя лісты дырэктару ПМК-249 Віктару Кісялевічу, дырэктару ПМК-86 Ігару Арцёмчыку і старшыні СВК “Дружба” Аляксандру Кузьмічу. Яшчэ адным хвалюючым і ўрачыстым момантам школьнага свята стала ўручэнне пашпартоў — нагадаем, што зараз гэты дакумент выдаецца грамадзянам у 14-гадовым узросце. На ўрачыстай лінейцы з рук начальніка групы па грамадзянстве і міграцыі Глускага РАУС Вольгі Сачок галоўны дакумент, які засведчвае асобу, атрымалі Кірыл Жалудковіч, Вікторыя Супрончык і Павел Нікіцін. Але больш за ўсіх радаваліся і хваляваліся першакласнікі: па-першае, ім быў уручаны падарунак, прыгожая маляўнічая кніга, ад імя Прэзідэнта нашай краіны, а па-другое, першы званок, якога так чакалі ўсе на гэтай лінейцы, насамрэч першым быў менавіта для іх. Ён празвінеў і паклікаў іх у новае — школьнае жыццё. Гэтым вераснёўскім днём школы адкрылі дзверы для ўсіх.

Таццяна ЛУКАШЭВІЧ
Фота Сяргея РУДЗІНСКАГА