Калі раскласці па палічках педагагічныя спецыяльнасці, здаецца, самай складанай будзе праца настаўніка пачатковых класаў. Прывучыць да ўседлівасці малых, якія яшчэ ўчора толькі й ведалі, што гуляць у лялькі ды ў машынкі, навучыць іх добра чытаць, лічыць, разважаць — лёгкім гэта ніяк не назавеш. І ўжо ніяк тут не абысціся без асаблівай любові да сваіх выхаванцаў і да сваёй прафесіі. Галіна Уладзіміраўна Усік, настаўніца вышэйшай катэгорыі сярэдняй школы № 2, у пачатковых класах працуе больш за дваццаць год і без школы, урокаў і вучняў сваё жыццё не ўяўляе. Вясною яна стала фіналісткай абласнога конкурсу “Настаўнік года” і заняла там у сваёй намінацыі другое месца. Напярэдадні прафесійнага свята Галіна Уладзіміраўна будзе ўзнагароджана Граматамі Міністэрства адукацыі і Магілёўскага аблвыканкама.

Віншуем Галіну Усік і ўсіх яе калег з Днём настаўніка!