У рамках дабрачыннай акцыі “Белдзяржстрах — дзецям” прынята рашэнне тры працэнты страхавога ўзносу ад набытых у гэты перыяд полісаў добраахвотнага страхавання ад няшчасных выпадкаў і захворванняў накіраваць на развіццё ўстаноў адукацыі. У лік трох школ Магілёўскай вобласці, якім вырашана аказаць названую спонсарскую дапамогу, трапіла і школа № 2 Глуска. Абяцаных падарункаў дзеці чакалі нядоўга: на лінейцы, прысвечанай апошняму званку, першакласнікі атрымалі наборы каляровай паперы, каляровага кардону і альбомы для малявання (40 камплектаў). Падарункамі для ўсіх сталі спецыяльная дошка для малявання і чарчэння, а таксама сертыфікат на 20 мільёнаў рублёў, які дырэктар Глускага прадстаўніцтва “Белдзяржстрах” Генадзь Ліпскі ўручыў кіраўні-ку ўстановы Святлане Лісіцы. Няма сумнення, што гэтыя сродкі былі вельмі дарэчы менавіта зараз, перад пачаткам летніх канікулаў, часу падрыхтоўкі школы да чарговага навучальнага года.

Нагадаем чытачам, што дабрачынная рэспубліканская акцыя “Белдзяржстрах — дзецям” пачалася 1 красавіка і прадоўжыцца да 30 чэрвеня, а значыць, у нас яшчэ ёсць час, заключыўшы дагаворы страхавання ад няшчасных выпадкаў і захворванняў, прыняць удзел у гэтай калектыўнай добрай справе.

Т. ЛУГАВАЯ