Моладзь за здаровы лад жыцця! А дзе і як гэта пацвердзіць найбольш яскрава і відавочна, як не падчас спаборніцтваў у спартыўнай зале?! Раённая спартландыя сярод працуючай моладзі прадпрыемстваў і арганізацый раёна “Моладзь за здаровы лад жыцця” прайшла ў мінулую пятніцу, 16 красавіка, на базе гімназіі Глуска. Колькасць каманд можна лічыць рэкорднай для апошняга часу — адзінаццаць, у кожнай чатыры чалавекі (мужчын і жанчын пароўну).

Як адзначыў, вітаючы ўдзельнікаў, намеснік старшыні райвыканкама Анатоль Ласоцкі, радасна бачыць у адным месцы столькі прыгожай моладзі, гэта найбольш актыўная і спартыўная частка нашага грамадства. Ён пажадаў усім добрых стартаў, бескампраміснай барацьбы і радасных перамог.

У моладзевай спартландыі прынялі ўдзел каманды “Жылкамгаса”, Глускага лясгаса, аддзела Дэпартамента аховы, раённага спажывецкага таварыства, райвыканкама, аддзела ўнутраных спраў, аддзела па надзвычайных сітуацыях і гімназіі (аб’яднаная каманда), СШ № 1, СШ № 2, цэнтральнай раённай бальніцы і цэнтра па забеспячэнні дзейнасці бюджэтных арганізацый. Прыемна, што з некаторымі камандамі былі іх кіраўнікі — падтрымлівалі, балелі за сваіх, і ўдзельнікам гэта дапамагло.

Ужо з першых конкурсаў стала зразумела, што наша працоўная моладзь (удзельнікі каманд) у добрай спартыўнай форме: дыстанцыі праходзілі хутка, з заданнямі спраўляліся дакладна. А зрабіць гэта, між іншым, было не так і лёгка, асабліва на хуткасць, калі ад твайго выніку залежыць вынік усёй каманды. Напружанне не на жарт, я вам скажу. Удзельнікі вудзілі рыбу вудай з магніцікам, ладзілі пераправу з дапамогай спартыўных дыванкоў, праходзілі дзве камбінаваныя эстафеты, а потым скакалі цераз скакалку, ды не проста так, а ўсе разам, адначасова — хто болей. Тут ужо як настроішся, як спаймаеш рытм — або атрымаецца, або не.

Асобныя каманды толькі два-тры разы змаглі скокнуць, некаторыя — дзясяткі разоў. Здавалася, рэкорд лясгаса і СШ № 2 у 34 разы ніхто не паб’е. Ажно не — каманда РАНС-гімназія сабралася, згрупавалася і запісала на свой рахунак 35 сумесных скачкоў! Зала выдала ім гром апладысментаў. Зрэшты, у розных конкурсах вызначаліся розныя каманды, таму і інтрыга захоўвалася да самага канца. Падвёўшы вынікі, журы вырашыла вызначыць і ўручыць, акрамя традыцыйных, асобны прыз — за волю да перамогі, ён дастаўся прадстаўнікам цэнтра па забеспячэнні дзейнасці бюджэтных арганізацый — як самай узроставай камандзе. А тройку прызёраў склалі аб’яднаная каманда РАНС-гімназія — трэцяе месца, СШ № 2 — другое, першае месца заваявалі прадстаўнікі аддзела ўнутраных спраў Ала Сяргеева, Таццяна Пранжыла, Аляксей Грышын і Аляксей Арлоў. Арганізатары мерапрыемства — райкам БРСМ, аддзел па адукацыі, спорце і турызме, аддзел ідэалагічнай работы, культуры і па справах моладзі — паклапаціліся, каб прызы і падарункі (як каштоўныя, так і суцяшальныя) дасталіся ўсім удзельнікам моладзевага спартыўнага свята, бо яны гэта заслужылі.

Т. ЛУКАШЭВІЧ

Фота А. ЗМІТРОВІЧ