Для насельніцтва Беларусі галоўным паказчыкам дабрабыту чалавека з’яўляюцца моцнае здароўе і адсутнасць шкодных прывычак. У час сацыялагічнага апытання, праведзенага Інфармацыйна-аналітычным цэнтрам, аб гэтым заявілі 70 працэнтаў рэспандэнтаў.

На другім месцы ў беларускіх грамадзян — высокі ўзровень даходу, матэрыяльная забяспечанасць (64,5 працэнта), на трэцім — наяўнасць моцнай сям’і (63 працэнты), на чацвёртым — станоўчыя чалавечыя якасці, выхаванне, адукаванасць (59,5 працэнта).

Любоў і павага з боку іншых людзей з’яўляюцца крытэрыямі дабрабыту для кожнага другога рэспандэнта (53 працэнты). Паспяховую кар’еру і высокую пасаду вылучаюць 30 працэнтаў апытаных беларусаў.

У час яшчэ аднаго рэспубліканскага сацыялагічнага апытання большасць жыхароў Беларусі (77 працэнтаў) заявіла, што краіне перш за ўсё неабходна захаваць парадак і стабільнасць.

Практычна кожны другі рэспандэнт адзначае, што трэба падтрымліваць цяперашні ўзровень жыцця і дабрабыту грамадзян (51,5 працэнта), узровень аказання медыцынскіх паслуг (49 працэнтаў), суверэнітэт і незалежнасць дзяржавы (49 працэнтаў), якасць прадуктаў харчавання і тавараў прамысловай вытворчасці (45,5 працэнта).

Крыху радзей рэспандэнты адзначаюць дасягненні ў галіне сацыяльна-арыентаванай палітыкі дзяржавы (39 працэнтаў), а таксама поспехі беларускіх спартсменаў (34,5 працэнта).

Абодва нацыянальныя сацыялагічныя апытанні былі праведзены ва ўсіх абласных цэнтрах краіны і Мінску, раённых гарадах і сельскіх населеных пунктах з 30 верасня па 7 кастрычніка 2015 года.