“Пражыць адно жыццё — выратаваць тысячы” — у гэтых некалькіх словах уся сутнасць і ўся важнасць прафесіі ратаўніка. Таму 25 ліпеня, у Дзень пажарнай службы, гучала нямала шчырых пажаданняў і слоў падзякі людзям гэтай сапраўды гераічнай прафесіі, у тым ліку і ў адрас работнікаў Глускага раённага аддзела па надзвычайных сітуацыях. І ніякага пафасу ў тым, што іх называлі героямі, няма, бо і ў мірны час пажарным прыходзіцца пераадольваць страх і інстынкт самазахавання. “А ты паспрабуй зрабіць крок у агонь, калі дома жонка і сын” — менавіта аб такіх момантах спяваў са сцэны кінатэатра «Арыён» Дзмітрый Сокал. Ён спяваў, а жонкі, маці, дзеці глускіх ратаўнікоў, што сядзелі ў зале, крадком выціралі слёзы. Бо добра ведаюць, як гэта — чакаць, сустракаць сваіх сужэнцаў, сыноў, бацькоў пасля цяжкай змены, калі яны вяртаюцца дадому стомленыя, запэцканыя сажаю і прапахлыя дымам. Прафесія пажарнага — гэта заўсёды рызыка, бо агонь  не адрознівае, хто перад ім, радавы ці маёр.

А яны ж да ўсяго іншага паспяваюць і прафілактычнай работай займацца, і ў спартыўных спаборніцтвах прызавыя месцы займаць, і грамадскай дзейнасці не тое што не цураюцца, а нават лічаць яе сваім абавязкам. Тое ж 25 ліпеня — пацвярджэнне. У сваё прафесійнае свята ўжо не першы год глускія ратаўнікі ладзяць свята для ўсіх землякоў. Яно адбылося пасля канцэрта (у якім зноў жа поруч з артыстамі раённага Дома культуры выступалі і самі пажарныя, і іх дзеці) на бульвары Грахоўскага. Дзяцей тут сабралася неймаверная колькасць, ды і многія дарослыя зацікавіліся. Дзіва што: можна было ўдосталь палазіць па пажарных машынах, паруліць (канешне, пры заглушаным рухавіку), прымераць ахоўны касцюм ратаўніка, пасядзець у спецыяльнай лодцы, падсілкавацца паходнай кашай і запіць яе чаем. Не абышлося без падарункаў, праўда, іх трэба было зарабіць, прайшоўшы чатыры этапы: адказаць на пытанні па тэме  захавання бяспекі, трапіць дроцікам у паветраны шарык, выбіць цацку з дапамогай спецыяльнай вялікай рагаткі, а таксама, і гэта, пэўне, было самым складаным іспытам, — зайсці ў дымакамеру.

Бачылі б вы, якія там сабраліся з дзяцей чэргі да кожнага з этапаў, параўнальна, як у бабруйскім «Еўраопце» ў суботу. А яшчэ ж быў фестываль фарбаў, дык і ўвогуле ўсё вакол расквецілася ў яркія колеры. Адным словам, зрабілі свята і сабе, і людзям.

Зразумела, і прафесійная, і грамадская дзейнасць глускіх ратаўнікоў у гэты дзень была адзначана на розных узроўнях. Так, усіх прысутных са святам павіншаваў ад імя раённай выканаўчай улады і раённага Савета дэпутатаў яго старшыня Андрэй Баброўнік. Ён уручыў падзячныя лісты Глускага райвыканкама старшым прапаршчыкам унутранай службы камандзірам аддзяленняў пажарнай аварыйна-выратавальнай часці № 1 Генадзю Гусараву і Івану Піліповічу.

Сіл, мужнасці і сухіх рукавоў пажадаў сваім калегам і падначаленым Андрэй Камінскі, начальнік Глускага РАНС, і таксама ўручыў узнагароды. Граматай Міністэрства па надзвычайных сітуацыях Рэспублікі Беларусь за дасягненне высокіх рэзультатаў у аператыўна-службовай дзейнасці па выніках 1-га паўгоддзя 2017 года і значны ўклад у папярэджанне і ліквідацыю надзвычайных сітуацый адзначаны прапаршчык унутранай службы камандзір аддзялення пажарнага аварыйна-выратавальнага паста № 12 Ігар Шыла. Не забываюцца ратаўнікі і на ветэранаў сваёй службы, і ў гэты дзень прагучалі імёны Уладзіміра Палякова, Ігара Анцюшэні, Вячаслава Кошаня, якія пастановай          Рэспубліканскага савета грамадскага аб’яднання “Беларускі саюз афіцэраў” узнагароджаны юбілейнымі медалямі “Беларускі саюз афіцэраў: 25 год”.

Шчырыя словы падзякі глускім пажарным, найперш членам пярвічнай моладзевай арганізацыі ўстановы, за дапамогу ў любых пачынаннях раённага камітэта БРСМ сказала ў гэты дзень яго першы сакратар Ганна Царык, пры гэтым падкрэсліла, што іх ніколі не трэба прасіць двойчы, што гэта людзі, словам і абяцанням якіх можна цалкам давярацца. Такую актыўную грамадскую пазіцыю райкам БРСМ адзначыў граматай і падарункам.

Дарэчы, як нам стала вядома, на калегіі Магілёўскага абласнога ўпраўлення МНС, дзе падводзіліся вынікі паўгоддзя, былі таксама названы імёны супрацоўнікаў Глускага РАНС. За ўзорнае выкананне службовых абавязкаў і дасягненне высокіх рэзультатаў нагрудным знакам Міністэрства па надзвычайных сітуацыях  Рэспублікі Беларусь «Выдатнiк» узнагароджаны старшы прапаршчык унутранай службы вадзіцель ПАВП № 13 Сяргей Берднік, а старшына ўнутранай службы Васіль Трыбуш атрымаў чарговае спецыяльнае званне, на ступень вышэйшае, чым прадугледжана займаемай пасадай, — прапаршчык унутранай службы.

Аксана ВАСІЛЕЎСКАЯ

Фота Сяргея РУДЗІНСКАГА