У рамках дабрачыннай акцыі “Цуды на Раство” да мнагадзетнай сям’і Таццяны і Канстанціна Слівашчанка завіталі госці. Першы сакратар райкама БРСМ Юлія Стаўская, старшыня раённай арганізацыі Чырвонага Крыжа Таццяна Пап-лаўская, а таксама актывісты БРСМ з другой школы Глуска ў вобразе Дзеда Мароза і Снягуркі сардэчна павіншавалі сям’ю са святамі і перадалі ім карысныя падарункі. Канцылярскія прыналежнасці, цацкі, настольныя гульні, адзенне для гэтай і іншых мнагадзетных сямей збіралі пярвічныя арганізацыі БРСМ школ раёна і неабыякавыя людзі.

У сям’і Таццяны і Канстанціна Слівашчанка вы-хоўваецца пяць дзяцей. Самай старэйшай дачцэ Паліне 16 гадоў, самая малодшая — Арына, ёй усяго паўтара годзіка. Дзеці шчыра радаваліся падарункам, а дарослыя дзякавалі гасцям за цеплыню і ўвагу да іх сям’і.

Ганна АЎТУХОВА

Фота Сяргея РУДЗІНСКАГА