Надвор’е апошнім часам крыху перамянілася — са спякотнага і сухога на грымотнае і ветранае, а месцамі і дажджлівае, аднак па вялікім рахунку гэта не надта знізіла ўзровень пажарнай бяспекі ў лясах і на тарфяні-ках. У гэтым годзе з пачатку пажаранебяспечнага перыяду ў Магілёўскай вобласці адбыўся 741 пажар сухой расліннасці, 73 пажары лесу і 7 — тарфянікаў. У выніку гарэння сухой травы знішчана і пашкоджана 159 пабудоў, з іх 52 жылыя дамы, знішчана тры аўтамабілі, на пажарах загінулі чатыры чалавекі, яшчэ чатыры — атрымалі апёкі. Для стабілізацыі сітуацыі на тэрыторыі вобласці дзейнічае забарона наведвання лясоў. У гэтай сувязі старшыням сельскіх выканаўчых камітэтаў неабходна актывізаваць растлумачальную работу з насельніцтвам, каб людзі былі асцярожнымі ў абыходжанні з агнём, прычым не толькі ў лесе (хадзіць туды зараз і ўвогуле недапушчальна), а і на ўласных падвор’ях. Кіраўнікам мясцовых прадпрыемстваў — ПМК-86, Глускага лясгаса, “Жылкамгаса”, сельскагаспадарчых вытворчых кааператываў — патрэбна прыняць усе меры для своечасовага выяўлення і тушэння пажараў на пачатковай стадыі, у поўнай гатоўнасці павінна быць уся прыстасаваная для пажаратушэння тэхніка.

Пра гэта ішла гаворка на пасяджэнні камісіі па надзвычайных сітуацыях, што створана і дзейнічае пры Глускім райвыканкаме, старшынстваваў на пасяджэнні намеснік старшыні райвыканкама Аляксандр Анцюшэня.