Пяць маладых вясковых сямей з розных куткоў Магілёўшчыны прынялі ўдзел у абласным сельскагаспадарчым конкурсе БРСМ “Уладар сяла”. Сёлета  ён адбыўся 8 ліпеня на свяце “Купалле” ў аграгарадку Александрыя Шклоўскага раёна. Пазмагацца за ганаровае званне лепшых з’ехаліся сем’і з Магілёўскага, Шклоўскага, Круглянскага, Асіпо-віцкага раёнаў, Глушчыну прадставіла сям’я Вікторыі і Андрэя Самусевых (на здымку), якія жывуць у аграгарадку Заеліца і выхоўваюць дзвюх цудоўных дачок.

Па ўмовах мерапрыемства ўдзельнікі павінны былі праявіць свае здольнасці ў некалькіх конкурсах. Пачалася праграма з візітнай карткі, дзе канкурсанты арыгінальна прэзентавалі свае сем’і, іх традыцыі, каштоўнасці. У конкурсе “Па дровы” трэба было прадэманстраваць спрыт і сілу праз распілоўванне вялікага бервяна, пасля гаспадар хутка сек яго на дровы, а гаспадыня складвала іх. Дарэчы, тут нашы землякі былі лепшымі. Веданне ўдзельнікамі гісторыі і культуры Магілёўскай вобласці знайшло сваё адлюстраванне ў іх адказах падчас віктарыны “Родны край”. Пасля кожная сям’я здзіўляла гледачоў і членаў журы смачнымі сялянскімі стравамі, якія можна было нават паспытаць, а таксама сваімі творчымі здольнасцямі і рукадзельнымі вырабамі. Так, сям’я Самусевых на суд журы прадставіла цудоўныя саматканыя паясы і дзіўны абраз Божай Маці, зроблены з гліны.

У выніку ў абласным конкурсе “Уладар сяла” перамагла сям’я са Шклова. Прадстаўнікі Глускага раёна занялі заслужанае другое месца. Але, як сказала Вікторыя Самусева, для іх сям’і галоўным быў удзел у мерапрыемстве, а не перамога. Ім было прыемна, пакінуўшы ў баку паўсядзённыя справы, атрымаць новыя ўражанні і добры настрой. Варта адзначыць, што ў падрыхтоўцы да мерапрыемства нашым землякам вельмі дапамагла першы сакратар раённага камітэта БРСМ Ганна Царык.

Усе ўдзельнікі і пераможцы былі ўзнагароджаны дыпломамі і каштоўнымі падарункамі. Конкурс стаў сапраўдным святам, нагадаў пра сямейныя традыцыі, уславіў вясковае жыццё і яшчэ раз пераканаў, што ў розных кутках Беларусі ёсць шмат моладзі, якая ўмее працаваць, любіць родны край, захоўвае народныя традыцыі.

Ганна АЎТУХОВА

Фота прадастаўлена Глускім раённым камітэтам БРСМ