Зімой будзем з садавіной
Каб на нашых сталах увесь год, да новага ўраджаю, былі бульба, капуста, буракі, морква, цыбуля, іншая агародніна і садавіна, у раённым спажывецкім таварыстве яны закладзены ў стабілізацыйны фонд. Па словах намесніка старшыні райпо па нарыхтоўках і прамысловасці Ганны Янушэўскай, спажывецкім таварыствам нарыхтавана 40 тон бульбы, 8 тон морквы, па 5 тон цыбулі, буракоў і яблыкаў. Захоўваюцца яны ў сховішчах для агародніны фермераў Сокала і Барысевіча. Па словах Ганны Янушэўскай, гэтай колькасці сельгаспрадукцыі хопіць для таго, каб тыя глушчане, хто не зрабіў сваіх нарыхтовак, на працягу ўсёй зімы і нават да самага лета маглі набываць усё неабходнае праз гандлёвую сетку райпо. Гэтыя ж прадукты выкарыстоўваюцца і на мясцовых прадпрыемствах грамадскага харчавання — для прыгатавання страў у рэстаране і кафэ.
