“Лепей блізкія суседзі, чым далёкая радня” — сцвярджае народная мудрасць, і з ёй нельга не пагадзіцца. Згодны з гэтым і работнікі Калаціцкага сельскага Дома культуры, якія ў мінулую пятніцу, 30 жніўня, запрасілі ўсіх аднавяскоўцаў на Дзень суседа. Шчыра прызнаюся, ведаючы некаторую інертнасць нашых людзей, я нават не чакала, што так шмат народу прыйдзе на гэтае свята. З другога боку, чаму і не? Канец рабочага тыдня, цудоўнае жнівеньскае надвор’е, бадзёрая музыка кліча прыходзіць і весці з сабой хеўру. Вось і сабралася нямала моладзі, сем’яў з маленькімі дзеткамі, прыйшло шмат людзей старэйшых, больш за тое — на імпрэзу ў Калацічы прыехалі нават з Заполля (а чым яны не суседзі, жыхары суседняй вёскі?).

Афішы, якія з’явіліся загадзя, абвяшчалі, што мерапрыемства будзе складацца як мінімум з трох частак, гэта значыць, з канцэрта, узнагароджванняў і гульняў. І ўсё заяўленае было, не падманулі. Артысты народнага вакальнага ансамбля “Азярынка” Калаціцкага СДК і іх добраахвотныя памочнікі радавалі сабраўшыхся народнымі і эстраднымі песнямі, дырэктар СДК Зоя Сіраж запрашала праверыць сваю ўдачлівасць і выйграць прызы — і выходзілі смельчакі, і выйгравалі! Ну і, зразумела, усе хацелі даведацца, хто ж атрымае падарункі за лепшы, самы прыгожы ды самы ўтульны, падворак і за іншыя справы на карысць агульнага жыцця вяскоўцаў.

Адзін за адным на сцэну выходзілі гаспадыні прыватных двароў — Ніна Грыпінская, Алена Грамыка, Алена Чорная. Дарэчы, апошняя, заўважыла вядучая, яшчэ і кулінарка выдатная, і ў доказ таму быў пірог, які Алена паставіла на агульны стол (само сабой, стол з прыгожым абрусам і прысмакамі таксама быў, як гэта і належыць на любой бяседзе). Жыльцы дома 190 з вуліцы Цэнтральнай уладкавалі летам у агульным двары дзіцячую пляцоўку і за гэта атрымалі прыз. А вось за самы ўтульны пад’езд узнагарода дасталася жыльцам дома 201 па той жа вуліцы. Не змаглі прысутнічаць на свяце, але іх імёны прагучалі, Таццяна Арцёмчык і Святлана Каранкевіч. У Таццяны Філіпаўны вельмі ўтульны двор, а работы рукадзельніцы Святланы Іванаўны ўпрыгожваюць усе мерапрыемствы, якія праводзіць гэты Дом культуры. І асобна дырэктар СДК адзначыла заўсёдніцу ўсіх мерапрыемстваў Вольгу Лузанаву з Заполля: яна не толькі сама не прапусціла ніводнага з іх, а яшчэ і ўсіх знаёмых і суседзяў з сабою гукае і прывозіць. Дадам, што свята адбылося дзякуючы падтрымцы эксперыментальнай базы “Глуск” і яе кіраўніка Ігара Арцёмчыка.

А. ПЯТРОВА

Фота аўтара