Дабавілі святла. На мемарыяльным комплексе “Воінская Слава” абноўлена асвятленне
Напэўна, многія людзі, хто вячэрняй парой мінае перакрыжаванне вуліц Максіма Горкага і Гагарына, звярнуў увагу, што наша памятная мясціна, мемарыяльны комплекс “Воінская Слава”, выглядае (менавіта тады, калі на вуліцах запальваецца святло) неяк па-іншаму. Уся справа ў абноўленым асвятленні комплексу: зараз яно не абмежавана толькі традыцыйнымі ліхтарамі на слупах, а дапоўнена падсветам знізу — і самога помніка Радзімы-маці, і ўсіх шасці тумбаў паўз дарожку. Дзякуючы гэтаму яны і выдзяляюцца асобна, і разам ствараюць цэласную кампазіцыю, як і было задумана стваральнікамі комплексу.
— Усё гэта — вынік агульнай справы, агульных намаганняў некалькіх арганізацый, — расказаў рэдакцыі намеснік дырэктара глускага “Жылкамгаса” Дзмітрый Арцёмчык. — Сродкі на набыццё свяцільнікаў і ўсяго неабходнага для іх падключэння ў памеры каля 1100 рублёў выдзеліла ТАА “БНБК-АГРА”, работу па мантажы абсталявання выконвалі спецыялісты “Жылкамгаса”, а Глускі ўчастак Асіповіцкага ЗВЭС Магілёўскага філіяла РУП “Белтэлекам” паклапаціўся пра відэаназіранне. Справа ў тым, што некалькі год назад на гэтым помніку ўжо рабілі новае асвятленне, але яно праіснавала нядоўга: хуліганы што разбілі, а што скралі, таму відэаназіранне там вельмі дарэчы. Вось так агульнымі намаганнямі гэты знакавы куточак Глуска стаў больш прыгожым і прыкметным.
