У інтэрэсах будучых пакаленняў
Васямнаццатага красавіка адзначаецца Міжнародны дзень помнікаў і гістарычных мясцін.
Зараз у Дзяржаўны спіс гісторыка-культурных каштоўнасцей Рэспублікі Беларусь уключана амаль 5,4 тысячы нерухомых аб’ектаў спадчыны, і іх спіс з года ў год папаўняецца. На пачатак бягучага года ў яго ўключаны 2350 помнікаў археалогіі, 1736 — архітэктуры, 1191 — гісторыі, 60 помнікаў мастацтва, 11 — горадабудаўніцтва і 4 запаведныя мясціны. Акрамя таго, у Дзяржаўны спіс гісторыка-культурных каштоўнасцей рэспублікі ўключаны 76 аб’ектаў духоўных (нематэрыяльных) гісторыка-культурных каштоўнасцей і 77 аб’ектаў рухомых гісторыка-культурных каштоўнасцей, гэта прадметы антыкварыяту, скарбы, кнігі, абразы, карціны.
А яшчэ ў рэспубліцы налічваецца 882 помнікі прыроды, і наша задача — захаваць гэтыя ўнікальныя, эталонныя і іншыя каштоўныя прыродныя аб’екты ў інтарэсах цяперашняга і будучых пакаленняў.
На тэрыторыі Глускага раёна размешчаны 2 помнікі гісторыка-культурнай спадчыны, гэта Касма-Даміянаўская царква ў вёсцы Гарадок (1814 года) (на здымку) і Глускае замчышча. Ёсць у нас таксама 24 помнікі археалогіі і 86 воінскіх пахаванняў, з іх 2 — перыяду Грамадзянскай вайны.
