Жыхары Глуска далучыліся да маладзёжнага патрыятычнага праекта “Песня роднай зямлі”

Жыхары Глуска далучыліся да маладзёжнага патрыятычнага праекта “Песня роднай зямлі”. Праект — гэта літаратурна-пластычны спектакль з аднайменнай назвай, у яго аснове — паэмы “Медуніца” і “Марыйка”, іх аўтар — Алесь Казека, старшыня Магілёўскага абласнога аддзялення Саюза пісьменнікаў Беларусі. Ролі ў пастаноўцы выконваюць навучэнцы Магілёўскага дзяржаўнага каледжа мастацтваў. У пятніцу 6 мая яны разам з аўтарам твора завіталі на Глушчыну.

Дарэчы, гэты спектакль на працягу Года гістарычнай памяці пакажуць ва ўсіх раёнах вобласці. Ажыццявіцца такой задуме дапамаглі Магілёўскі абласны выканаўчы камітэт і Беларускі фонд міру.

Свет трымаецца на гармоніі і духоўнасці, на любові людзей да сваёй зямлі, да родных, лічыць Алесь Казека. “Менавіта любоў робіць чалавека Чалавекам: любоў да жыцця, да Радзімы, да Бога”, — упэўнены паэт. Спектакль “Песня роднай зямлі” пабудаваны на кантрасце паміж гармоніяй Сусвету і жудасцю вайны, і менавіта гэты кантраст выклікае ў гледача моцнае эмацыянальнае напружанне, застаўляе задумацца пра сапраўдныя каштоўнасці.