Бесправадную сістэму аўтаматычнага рэгулявання ацяплення ў памяшканні распрацавалі ў Беларусі

Бесправадную сістэму аўтаматычнага рэгулявання ацяплення ў памяшканні распрацавалі ў Беларусі, паведаміў дырэктар Беларускага інавацыйнага фонду Дзмітрый Калінін.

«Гэта сістэма прызначана перш за ўсё для шматкватэрных дамоў і адміністрацыйных будынкаў, такіх як бальніцы, школы, офісы. Яна дае магчымасць кіраваць тэмпературным рэжымам у памяшканнях. У кожным пакоі можна ўстанавіць сваю тэмпературу, і сістэма будзе яе падтрымліваць. Адметная асаблівасць гэтай сістэмы — цэнтралізаванае кіраванне, гэта значыць можна праз планшэт або любое іншае мабільнае ўстройства, знаходзячыся ў любой кропцы, кіраваць тэмпературным рэжымам у доме або офісе», — расказаў Дзмітрый Калінін.

Устаноўка ўбудоўваецца ў батарэі. «Можна настроіць гэту сістэму так, каб у 10.00 тэмпература зніжалася, таму што нікога ўсё роўна няма дома, а да вяртання гаспадароў, напрыклад, да 18.00, гэта сістэма можа падняць тэмпературу да аптымальнай і камфортнай. Такім чынам, у час ацяпляльнага сезона можна эканоміць каля 30 працэнтаў ад платы за ЖКП», — адзначыў дырэктар Беларускага інавацыйнага фонду.

Сістэму распрацавалі ў ТДА «ТахатАксі». Распрацоўка заняла трэцяе месца ў намінацыі «Лепшы інавацыйны праект» рэспубліканскага конкурсу інавацыйных праектаў 2016 года.

Рэспубліканскі конкурс інавацыйных праектаў праводзіць Дзяржаўны камітэт па навуцы і тэхналогіях з 2010 года пры ўдзеле Беларускага інавацыйнага фонду, Нацыянальнай акадэміі навук, Міністэрства адукацыі, БРСМ. Удзельнікі конкурсу — ВНУ, дзяржаўныя ўстановы, прадпрыемствы, аўтарскія калектывы, індывідуальныя прадпрымальнікі, фізічныя асобы. Пераможцамі і прызёрамі становяцца праекты з высокай ступенню прапрацоўкі і, адпаведна, гатоўнасці да рэалізацыі.