Члены БРСМ запрашаюць жыхароў Глуска на выбары
Мясцовая моладзь у чарговы раз пацвердзіла тое, што яна найбольш актыўная і мабільная частка нашага грамадства. Як толькі завяршылася рэгістрацыя кандыдатаў у дэпутаты, актывісты Беларускага рэспубліканскага саюза моладзі пачалі ладзіць агітацыйныя пікеты ў падтрымку выбараў дэпутатаў у мясцовыя Саветы. Адзін з такіх пікетаў адбыўся 22 студзеня ў Глуску на бульвары Грахоўскага, прадстаўнікі вучнёўскай моладзі заклікалі жыхароў гарпасёлка выканаць свой грамадзянскі абавязак і прыйсці 18 лютага (або падчас датэрміновага галасавання) на свае выбарчыя ўчасткі і прагаласаваць. Кожны, да каго звярталіся члены БРСМ, атрымліваў лістоўку з дэвізам моладзевай агітацыйнай кампаніі — “18 лютага будзем разам са сваёй краінай!”.
З 19 па 22 студзеня агітацыйныя пікеты прайшлі ў аграгарадку Калацічы, там пікет арганізавала мясцовая рабочая моладзь, і ў аграгарадку Заеліца, дзе да жыхароў звярталіся актывісты з ліку вучнёўскай моладзі. Пікеты ў падтрымку выбараў і кандыдатаў у дэпутаты — членаў БРСМ будуць праходзіць перыядычна, патлумачыла першы сакратар райкама БРСМ Юлія Стаўская.
А. ВАСІЛЕЎСКАЯ
Фота С. РУДЗІНСКАГА
