Стаўка на сумесную дзейнасць

У Глускім раёне 62 пярвічныя прафсаюзныя арганізацыі, куды ўваходзіць больш за чатыры з паловай тысячы чалавек, яны складаюць раённае аб’яднанне прафсаюзаў. На мінулым тыдні адбылося пасяджэнне савета гэтага аб’яднання, дзе гаворка ішла пра выкананне ў Глускім раёне Праграмы дзейнасці і ўзаемадзейнасці  аб’яднанняў арганізацый прафсаюзаў, што ўваходзяць у Федэрацыю прафсаюзаў Беларусі, за 2016 год. І насамрэч, раённае аб’яднанне прафсаюзаў, адзначыў яго старшыня Аляксандр Леўчанка, у сваёй дзейнасці робіць стаўку на сумесную работу з пярвічнымі арганізацыямі і з мясцовай выканаўчай уладай. Асноўныя намаганні накіраваны на работу па ахове працы і прававой абароне працоўных. Так, у гэтым годзе прававыя інспектары працы абласнога аб’яднання прафсаюзаў у Глускім раёне правялі восем прыёмаў грамадзян, а ў ПМК-86 “Водбуд” і ў аграфірме “Слаўгарадскі” былі праведзены маніторынгі па ахове працы, дадзены рэкамендацыі, як лепш і хутчэй выправіць выяўленыя недахопы. Актыўна ўзаемадзейнічае раённае аб’яднанне прафсаюзаў з мясцовымі маладзёжнай і ветэранскай арганізацыямі, прымае ўдзел у культурным жыцці раёна. Сведчаннем гэтаму стаў канцэрт “Народныя таленты табе, Беларусь!”, праведзены ў рамках Тыдня прафсаюзнай культуры.

Другое пытанне парадку дня тычылася рэалізацыі ў Глускім раёне палажэнняў Праграмы сацыяльна-эканамічнага развіцця на 2016—2020 гады. Інфармацыя, з якой выступіў старшыня раённага аб’яднання прафсаюзаў Аляксандр Леўчанка, была прынята да ведама і зацверджаны праект пастановы.

У рабоце пасяджэння савета Глускага раённага аб’яднання прафсаюзаў прынялі ўдзел старшыні 38 пярвічных арганізацый, абласное аб’яднанне прафсаюзаў прадстаўляў Вадзім Новікаў. Ён адзначыў, што ў Магілёўскай вобласці пачасціліся выпадкі ўтойвання няшчасных выпадкаў на вытворчасці, закрануў некаторыя іншыя пытаннні аховы працы, на якія найперш павінны звяртаць увагу прафсаюзныя лідары ў сваіх працоўных калектывах.

Таццяна ЛУКАШЭВІЧ