На ўборцы снегу
Зноў снег, і зноў ён пачаў работу яшчэ ўночы. Прычым яго каляя не вуліца, а тратуары і больш вузкія месцы, тыя, дзе ходзяць людзі і дзе звычайны трактар з адвалам не праедзе і не развернецца.
Новая ўборачная машына “Беларус” МТЗ-320.4, невялікі манеўраны трактарчык, Глускаму ўнітарнаму камунальнаму прадпрыемству “Жылкамгас” і яшчэ 15 “Жылкамгасам” вобласці выдзелена Магілёўскім аблвыканкамам падчас абласных “Дажынак”. Прыбыла новая тэхніка ў Глуск напрыканцы лістапада, а ўжо 3 снежня выйшла ў першы рэйс. Трактар аснашчаны адвалам для ўборкі снегу, а таксама шчоткай, таму работа для яго знойдзецца як снежнай зімой, так і ў іншыя поры года.
Працуе на новым МТЗ-320.4 Анатоль Варанчукоў, па-першае, гэта адзін з найбольш вопытных вадзіцеляў прадпрыемства (у “Жылкамгасе” ён ужо 16 гадоў), па-другое, палівачная машына, на якой ён ездзіў да гэтага, зараз незапатрабаваная. Ці лёгка яму працаваць на гэтым кампактным снегаўборачным трактары, мы пытацца не сталі, калі пачулі, што гэтую змену ён пачаў у тры гадзіны ночы, і калі ўбачылі, колькі яму даводзіцца манеўраваць, прыбіраючы снег на бульвары Грахоўскага. А ўвогуле ж яго маршрут і сфера яго адказнасці — гэта ўсе тратуары Глуска — ад былой мэблевай фабрыкі да бальніцы і далей, ад “сямі вятроў” і за першую школу. Часам, калі з-за снегу нічога не бачна, даводзіцца рухацца выключна па прыборах, кажа ён, да таго ж вузкія месцы патрабуюць большай дакладнасці руху і ўважлівасці, тым больш цёмначы. Словам, работа даволі напружаная, мы гэта зразумелі самі, а снег, які ішоў не перастаючы, не даваў магчымасці марудзіць ці адпачываць. Таму Анатоль Іванавіч доўга не стаяў, а зноў узяўся за работу. Яе ў снежнае надвор’е камунальнікам хапае: і тым рабочым, што чысцяць снег уручную, і тым вадзіцелям і трактарыстам, што заняты снегаўборкай на шасці адзінках розных відаў тэхнікі.
Т. ЛУГАВАЯ
Фота Г. АЎТУХОВАЙ