Наша зямлячка, намеснік дырэктара ААТ “Аграфірма “Слаўгарадскі” па ідэалогіі, кадрах і быце Вікторыя Самусева, была ў ліку 24 прадстаўніц  аграпрамысловага комплексу Магілёўшчыны, якія прынялі ўдзел у II абласным аглядзе-конкурсе “Маладая гаспадыня — 2017”. Мерапрыемства адбылося 16 лістапада, напярэдадні Дня работнікаў сельскай гаспадаркі і перап-рацоўчай прамысловасці АПК, у Кіраўску і праходзіла на базе раённага Цэнтра культуры. Яго арганізатарамі выступілі камітэт па сельскай гаспадарцы і харчаванні Магілёўскага аблвыканкама, абласны камітэт Беларускага прафсаюза работнікаў АПК, Магілёўскі абласны аграпрамысловы саюз.

Падчас конкурсу ўдзельніцы дэманстравалі свае лепшыя творчыя здольнасці і, безумоўна, паказалі, на што яны здатныя як сельскія гаспадыні. Усяго было пройдзена шэсць конкурсных этапаў, два з якіх былі прапанаваны ў якасці дамашняга задання — на лепшую страву і самае арыгінальнае рукадзелле. Пра сябе, сваю сям’ю, работу і захапленне канкурсанткі расказалі ў “Візітоўцы”, прадэманстравалі веды ў “Спаборніцве інтэ-лектуалаў”, раскрылі таленты падчас творчага этапа, а яшчэ паказалі, наколькі могуць быць эфек-тнымі і жаноцкімі падчас дэфіле “Мой стыль”. Мы папрасілі Вікторыю расказаць пра тое, як яна рыхтавалася да конкурсу, падзяліцца сваімі ўражаннямі ад яго.

— Для мяне гэта ўжо другі падобны конкурс, — гаворыць Вікторыя. — Першы быў “Уладар сяла” на абласным свяце ў Александрыі. Там наша сям’я заняла другое месца. Калі прапанавалі прадставіць Глускі раён на конкурсе “Маладая гаспадыня — 2017”, згадзілася адразу. Адразу ж пачала і рыхтавацца. Больш грунтоўна падышла да творчых заданняў. На сямейным савеце вырашылі, што разам са старэйшай дачкой Валерыяй будзем спяваць песню “Сніцца сон” з рэпертуара Ані Лорак, а малодшая Аляксандра дапоўніць нумар у касцюме анёла. Самым складаным было зрабіць гэты касцюм. Дапамагалі ўсе — і бабуля з дзядулем, і, канешне ж, мой муж. У выніку атрымалася прыгожа. Таму, выступаючы на сцэне з гэтым нумарам, адчувала сябе даволі ўпэўнена. Самым лепшым прызнаннем нашага нумара былі шчодрыя апладысменты журы і гледачоў. З задавальненнем рыхтавалася я і да кулінарнага конкурсу. Хацелася зрабіць штосьці такое, чаго яшчэ ніколі не рабіла. Дапамог інтэрнэт. Там знайшла арыгінальны, на мой погляд, рэцэпт, як прыгатаваць курыцу ў вінным соусе. Зрабіла, і атрымалася на выгляд даволі апетытна, з непаўторным пахам. Думаю, што журы спадабалася. Наогул, там усе гаспадыні былі на ўзроўні. Самым жа складаным для мяне было дэфіле. Крыху няёмка адчувала сябе на сцэне перад публікай. Не хапала той лёгкасці і натуральнасці, якая, скажам, была ў пераможцы конкурсу, кіраўчанкі Елізаветы Шэрстабаевай. Гэтаму трэба яшчэ вучыцца. А так усё было класна і весела. Няхай я не стала прызёрам, але не гэта галоўнае. Важна тое, што я і мае дзеці атрымалі шмат станоўчых эмоцый і мы запомнім гэты дзень як адзін з самых яркіх у нашым жыцці. Дзеля гэтага і варта было ехаць на конкурс. Хацелася б сказаць вялікі дзякуй усім, хто падтрымліваў мяне падчас выступлення. Гэта старшыня райкама прафсаюза работнікаў АПК Віктар Лугін, дырэктар Заеліцкага сельскага Цэнтра культуры і вольнага часу Алена Мікуліч, работніца Цэнтра Святлана Стрэж і, вядома ж, мае дочкі. Астатнія, члены маёй сям’і, мае знаёмыя, перажывалі за мяне дома. І вечарам, калі вярнуліся з конкурсу, мы ўсе разам адсвяткавалі гэту падзею. Дарэчы, быў і смачны торт, які мне з дыпломам удзельніка падарылі на гэтым цудоўным свяце маладых гаспадынь вобласці.

Вольга ЧУЧВАЛ

Фота прадастаўлена рэдакцыяй газеты “Кіравец”