Сакрэты майстэрства захоўваць і перадаваць

Урачысты сход работнікаў культуры вобласці, прысвечаны прафесійнаму святу, праходзіў у Бабруйску, у тэатры драмы і камедыі імя Дуніна-Марцінкевіча. Цырымонія ўшанавання лепшых прадстаўнікоў гэтай творчай прафесіі праходзіла і на тэатральных падмостках, і ў зале Бабруйскага мастацкага музея. Якраз у яго сценах сваю заслужаную ўзнагароду, Ганаровую грамату ўпраўлення культуры Магілёўскага аблвыканкама, з рук начальніка ўпраўлення культуры Анатоля Сінкаўца атрымаў і наш зямляк, метадыст-майстар Заеліцкага Дома рамёстваў Уладзімір Станкевіч. Уладзімір Іванавіч сваімі бандарнымі вырабамі вядомы не толькі ў Глускім раёне і вобласці — ён ужо год як член Саюза майстроў Беларусі. Сваёй чарговай узнагароды ўдастоены за захаванне і пераемнасць народных традыцый, а таксама за актыўны ўдзел у выставах дэкаратыўна-прыкладнога мастацтва.
Як паведамілі нам у аддзеле культуры Глускага райвыканкама, зараз падрыхтаваны і перададзены ў абласную камісію дакументы на прысваенне Уладзіміру Станкевічу звання народнага майстра. Няма сумнення, што спецыялісты па годнасці ацэняць тое вялікае майстэрства, з якім бондар падыходзіць да вырабу кожнай рэчы, і тыя намаганні, якія ён прыкладае для адраджэння такога незаслужана забытага народнага рамяства, як бондарства.

Т.ЛУГАВАЯ