Яго аўтапартрэт у Парыжы

Удзел у разнастайных творчых конкурсах для наведвальнікаў выяўленчай студыі “Вернісаж”, што дзейнічае пры раённай гімназіі, справа звыклая, але міжнародны маштаб ім пакарыўся ўпершыню. На конкурс “Партрэт для музея”, аб’яўлены камісіяй Арганізацыі Аб’яднаных Нацый па пытаннях адукацыі, навукі і культуры (ЮНЕСКА), глушчане таксама адправілі некалькі сваіх работ. Да агульнай радасці адна з іх атрымала ўхвальны водгук арганізатараў. Гэта аўтапартрэт Паўла Статкевіча, ён вучыцца ў 2 “А” класе гімназіі, любіць маляваць і любіць, каб усё навокал было светла, чыста, радасна. Вось і сябе намаляваў у прыгожай рамцы, вакол шмат святла, а позірк вялікіх вачэй, здаецца, адкрыты ўсяму свету. Зараз аўтапартрэт глускага хлопчыка знаходзіцца ў штабкватэры ЮНЕСКА ў Парыжы разам з 16 іншымі работамі такіх жа юных мастакоў з Беларусі. Усяго ж на конкурс было даслана больш за 500 дзіцячых малюнкаў.

Т.ЛУГАВАЯ
Фота С.РУДЗІНСКАГА
На здымку: Павел Статкевіч