За іх у адказе
Сёння, 19 жніўня, сусветная супольнасць адзначыць Міжнародны дзень бяздомных жывёл, які праводзіцца звычайна ў трэцюю суботу апошняга летняга месяца. Як распавёў рэдакцыі начальнік Глускай раённай інспекцыі прыродных рэсурсаў і аховы навакольнага асяроддзя Леанід Васілеўскі, усталяваны гэты дзень у 1992 годзе па прапанове Міжнароднага таварыства праў жывёл, бо праблема бяздомных жывёл актуальная для многіх краін свету. Пры гэтым цяжка спрачацца з тым, што беспрытульныя сабакі і каты — рэальная пагроза для людзей, пагаджаюцца эколагі. Бадзяжныя жывёлы з’яўляюцца пераносчыкамі вірусных захворванняў і, што самае страшнае, нярэдка нападаюць на дзяцей і дарослых.
Безумоўна, у тым, што на нашых вуліцах бегаюць зграі сабак, а на сметніках плодзяцца каты, вінаваты самі людзі. Статыстыка сведчыць, што каля 75 % бяздомных сабак і котак калісьці былі хатнімі. Але ад заклікаў да свядомасці і сумлення некаторых гаспадароў мала што мяняецца, таму прыходзіцца ісці на іншыя меры, якія не заўсёды можна назваць гуманнымі. Па дадзеных зааабаронцаў, у Беларусі штогод адлоўліваецца каля 80 тысяч бяздомных жывёл, і большасць з іх усыпляюць. Так, 54 у райцэнтры і 16 на тэрыторыі раёна — такія лічбы па колькасці адстраляных за сем месяцаў бягучага года бадзяжных сабак назвалі нам у мясцовым “Жылкамгасе”.
Між тым, не заўсёды пад адстрэл трапляюць насамрэч беспрытульныя сабакі, сустракаюцца сярод іх і тыя, што збеглі з двара або каго гаспадары выпусцілі пагуляць. Каб такога не адбывалася, у “Жылкамгасе” нагадваюць некаторыя правілы ўтрымання хатніх жывёл. У прыватнасці, гаспадары павінны выводзіць сваіх гадаванцаў на прагулку на кароткім павадку і ў намордніку (выключэнне робіцца для шчанюкоў узростам да трох месяцаў і дэкаратыўных парод, чый рост у карку не перавышае25 см, — для іх абавязковы толькі павадок). Нельга выпускаць сабаку пагуляць аднаго, і неабходна прадугледзець меры, каб ён не мог выбегчы з двара самастойна. Калі ж такое здарылася, патрэбна патэлефанаваць у дыспетчарскую “Жылкамгаса” і папярэдзіць.
А. ПЯТРОВА
