Калі на рэдакцыйны вайбер прыйшлі гэтыя фотаздымкі (побач з кантэйнернымі пляцоўкамі каля шматкватэрных дамоў навалена галлё, фота 1), мы было падумалі, што гэта ў чарговы раз незадаволеныя спажыўцы жыллёва-камунальных паслуг такім чынам сігналізуюць нам пра хібы ў рабоце жыллёва-камунальнай службы, у прыватнасці, пра нясвоечасовы вываз смецця. Аказалася ж усё з дакладнасцю да наадварот. Нам патэлефанавала майстар УКП “Жылкамгас” Аксана Змітровіч і растлумачыла, што гэтыя фатаграфіі зрабілі іх работнікі і не дзе-небудзь на ўскраіне гарадскога пасёлка, а на цэнтральнай яго вуліцы, Кірава, каля дамоў № 43, 46, 58. На фатаграфіях добра бачна, што на спецыяльных пляцоўках побач з кантэйнерамі для цвёрдых бытавых адходаў навалены галлё, трава, паламаныя дошкі (ці то старыя падаконнікі, ці то дзвярныя вушакі). На адным кадры зняты і парушальнік, што называецца злавілі на гарачым, прама каля кантэйнернай пляцоўкі чалавек з каляскі звальвае кучу вецця…

— Гэты чалавек жыве на суседняй вуліцы, Тэльмана, нам вядомы і яго дакладны адрас, і яго прозвішча, нагрузіў тачку галля і прывёз яго сюды, скінуў каля пляцоўкі, — расказала Аксана Змітровіч. — На жаль, гэта не адзінкавы выпадак, так робяць і некаторыя іншыя жыльцы прыватных дамоў, размешчаных недалёка ад шматпавярховак: прыносяць і кідаюць на кантэйнерныя пляцоўкі мяхі і проста кучы травы, галля. У выніку кантэйнеры перапоўнены, пляцоўкі завалены, няма як падысці, няма куды пакет бытавога смецця выкінуць. Скардзяцца жыльцы кватэр, маўляў, мы дрэнна працуем. Лішняя работа і нашым работнікам, да таго ж не самая лёгкая і не самая прыемная: уручную грузіць гэтую расліннасць у кузаў машыны. Людзі рукі сабе павырывалі, пакуль папрыбіралі гэтыя пляцоўкі.

І праўда, калі наш карэспандэнт праехаў па названых адрасах, амаль паўсюль было ўжо чыста, толькі на Кірава, 43, яшчэ заставаліся раслінныя і будаўнічыя адходы (фота 2). Ну і хто, скажыце, калі ласка, дрэнна робіць? Жылкамгас недапрацоўвае ці мы самі не глядзім ні вока ні бока? Глядзім, вядома ж, але толькі на сваім селішчы, каб нам было чыста і зручна, а заведзены парадак, устаноўленыя правілы няхай хто іншы выконвае.

— Калі мужчыну, які прывёз галлё на тачцы, рабочыя жылфонда зрабілі заўвагу, ён аблаяў іх бруднымі словамі і дадаў: я плачу вам грошы, так што прыбірайце, — дзеліцца набалелым Аксана Змітровіч. — Так, нам плацяць за вываз ЦБА, і мы іх рэгулярна вывозім. Па прыватным сектары строга па графіку ходзіць машына (ад людзей патрабуецца толькі спакаваць, звязаць і вынесці на вуліцу). Па графіку мы вывозім цвёрдыя бытавыя адходы і з кантэйнерных пляцовак у жылфондзе, але трэба памятаць, што гэта пляцоўкі для ЦБА і другаснай сыравіны, а не для раслінных адходаў і будаўнічага смецця.

Дарэчы, для чалавека з галлём гэтая гісторыя мела працяг: яго выклікалі ў інспекцыю прыродных рэсурсаў і аховы навакольнага асяроддзя. 

— За парушэнне патрабаванняў заканадаўства аб абыходжанні з адходамі (размяшчэнне адходаў (галін, сучча) у несанкцыянаваным месцы) на грамадзяніна быў складзены адміністрацыйны пратакол, — расказала рэдакцыі начальнік інспекцыі прыродных рэсурсаў і аховы навакольнага асяроддзя Ірына Фомава. — Як высветлілася, чалавек вывез галлё не са свайго саду, дапамагчы яго папрасіў стары сусед, мужчына не доўга думаючы наваліў галіны і павёз на бліжэйшую кантэйнерную пляцоўку. Вось і атрымалася, што суседу дапамог, а сабе непрыемнасці набыў. Згодна з ч. 3 арт. 16.44 Кодэкса аб адміністрацыйных правапарушэннях Рэспублікі Беларусь максімальны штраф за такое парушэнне можа дасягаць 30 БВ для фізічнай асобы, а для юрыдычнай — да тысячы БВ. 

Няхай гэты прыклад будзе іншым навукай: другім дапамагай, але патрабаванні заканадаўства не парушай.

Таццяна ЛУКАШЭВІЧ

Фота Алены ЗМІТРОВІЧ