Надвор’е апошніх тыдняў спрыяе больш хуткаму паспяванню культур на палях, у прыватнасці, рапсу. Вось чаму падчас раённага семінара-нарады па падрыхтоўцы сельскагаспадарчых арганізацый да ўборачных работ гаворка ішла найперш пра ўборку азімага рапсу. Праведзены семінар быў 5 ліпеня на базе СВК “Калгас “Слаўгарадскі” — гаспадаркі, якая першай у раёне пачала пробную ўборку гэтай культуры. Усяго ж, па словах намесніка начальніка ўпраўлення сельскай гаспадаркі і харчавання Валерыя Глаза, убіраць рапс у раёне будуць 24 камбайны, нагрузка на кожны складае 275 гектараў, а разліковы тэрмін уборкі рапсу — 7 дзён, хутчэй справяцца ў “Завалочыцах” — за 5 дзён, больш часу спатрэбіцца РАПТЗ, а таксама калгасам “Зара камуны” і “Слаўгарадскі” — па 8 дзён. У тым жа “Слаўгарадскім”, хоць і пачалі першымі жаць азімы рапс, аднак штодня праводзяць маніторынг паспявання культуры на розных участках, бо да страты ўраджаю могуць прывесці як прамаруджванне, так і залішні паспех. Што да поўнага спектра ўсіх уборачных работ, то сяголета на жніве зерневых і зернебабовых культур у раёне будуць працаваць 32 камбайны, нагрузка на кожны складае 297 га, па разліках сярэдняя выпрацоўка на дзень — 485 гектараў, такімі тэмпамі ўборка ў раёне пройдзе за 19 дзён, чакаемая колькасць намалочанага зерня 22 300 тон у амбарнай вазе (без уліку зерня кукурузы). Як зазначыў, выступаючы на семінары старшыня СВК “Калгас “Слаўгарадскі” Дзмітрый Дзем’янкоў, у гэтай гаспадарцы патрэбна ўбраць 1790 гектараў зерневых і зернебабовых культур, нагрузка на кожны з пяці камбайнаў — 350 гектараў, а гэта значна больш, чым у сярэднім па раёне, таму калгас будзе набываць яшчэ адзін зернеўборачны камбайн, а з ім і новы прэспадборшчык. Поўнасцю тут гатовы да дапрацоўкі і прыёмкі новага ўраджаю тры зернесушыльныя комплексы, а таксама 8 зернескладоў.
У гэтым удзельнікі семінара-нарады маглі ўпэўніцца, пабываўшы на месцы, непасрэдна на адным са складоў, і паглядзеўшы работу падлогавай зернесушылкі. Такія ёсць у кожнай гаспадарцы, зазначыў старшыня райвыканкама Юрый Дымша, аднак не ўсе выкарыстоўваюць іх у рабоце, між тым гэта і зручна, і эканомна, бо працуюць такія сушылкі на мясцовых відах паліва. Нямала тэхнічных нюансаў было абмеркавана непасрэдна перад адным з камбайнаў, што знаходзіўся на машынным двары “Слаўгарадскага”. У тым ліку і пра тое, як такая тэхніка павінна быць абсталявана ў плане супрацьпажарнай бяспекі. На гэта звярнуў увагу начальнік раённага аддзела па надзвычайных сітуацыях Павел Шарснёў. Камбайн каштуе вялікія грошы, а згарэць можа за 15 хвілін, вось чаму найперш неабходна паклапаціцца пра недапушчэнне ўзгарання, а калі яно ўсё ж адбылося, пра спраўныя і ў патрэбнай колькасці сродкі пажаратушэння. Дарэчы, на полі з кожнай групай працуючых зернеўборачных камбайнаў павінны быць ёмістасці з вадой, а таксама трактар з плугамі, каб пры неабходнасці правесці своечасовае абворванне.
Кожная ўборачная кампанія — гэта вынік усёй папярэдняй работы хлебаробаў, прычым не толькі той, якая была праведзена ў полі падчас сяўбы і догляду за культурамі, а і ўсяго, што звязана з тэхнікай бяспекі, працоўнай дысцыплінай, маральным і матэрыяльным заахвочваннем працоўных і бытавымі ўмовамі (абавязковым для ўсіх двухразовым харчаваннем удзельнікаў жніва, работай душавых і іншага). На гэты бок работ была звернута асаблівая ўвага ўдзельнікаў семінара — кіраўнікоў, галоўных аграномаў, эканамістаў сельскагаспадарчых арганізацый раёна, а таксама спецыялістаў упраўлення сельскай гаспадаркі і харчавання райвыканкама. Апошняя зверка пазіцый, гатоўнасць кожнай гаспадаркі да ўборачных работ і падвядзенне вынікаў работы семінара адбыліся тут жа, у Заеліцы, у актавай зале гандлёвага цэнтра.
Усё, што было сказана і ў чарговы раз абмеркавана 5 ліпеня на гэтым семінары, было вельмі дарэчы, бо ўжо ў суботу — нядзелю ўсе гаспадаркі выбарачна зжалі першыя гатовыя ўчасткі азімага рапсу, а праз дзень — два ў раёне пачалася масавая ўборка гэтай алейнай культуры.
Таццяна ЛУКАШЭВІЧ
Фота Наталлі АКУЛІЧ
і Сяргея РУДЗІНСКАГА
На здымках: уборка рапсу ў СВК «Калгас «Зара»; падчас семінара на машынным двары СВК «Калгас «Слаўгарадскі»