Партнёрскія адносіны вельмі верагодны

Кіраўнік каапсаюза Украіны Уладзіслаў Ганчарэнка са сваімі намеснікамі пабывалі ў Глускім раёне, дзе наведалі цэх замарозкі Глускага раённага спажывецкага таварыства, пазнаёміліся з прынцыпам работы, асноўнымі этапамі працэсу шокавай замарозкі сыравіны (на той момант ішла замарозка журавін). Гэта паездка — візіт у адказ на запрашэнне старшыні Белкаапсаюза Сяргея Сідзько, які некалькі раней на Украіне знаёміўся з дзейнасцю ўкраінскіх кааператараў.
У Глуску сяброўскую дэлегацыю сустракалі старшыня Магілёўскага аблспажыўсаюза Сяргей Шуркала, старшыня Глускага райвыканкама Юрый Дымша, падрабязныя тлумачэнні ў ходзе экскурсіі па цэху замарозкі давалі старшыня мясцовага спажывецкага таварыства Сяргей Зубчонак, спецыялісты вытворчасці. Да паездкі ў Глуск было азнаямленне з гандлёвай сеткай Міншчыны, далей госці з Украіны паедуць у Калінкавіцкі раён, дзе наведаюць тамтэйшую зверагаспадарку.
У гэтым годзе Глускае спажывецкае таварыства экспарціравала сваёй сыравіны больш як на 200 тысяч долараў ЗША, яе адгрузкі прадаўжаюцца і зараз. Замарожаная прадукцыя глускіх кааператараў, асабліва дарункі лесу, карыстаецца попытам у замежных партнёраў, таму ці дзіўна, што такой вытворчасцю зацікавіліся ў каапсаюзе Украіны. І няхай гэта паездка толькі азнаямляльная, яна не мела мэты заключэння якіх-небудзь дамоўленасцяў, але далейшыя партнёрскія адносіны з мясцовым спажывецкім таварыствам, мяркуючы па ўхвальных водгуках гасцей, не тое што не выключаны, а вельмі верагодны.

Т.ЛУКАШЭВІЧ
Фота С.РУДЗІНСКАГА