Вялікая перамога маленькай цымбалісткі
Гаворка ідзе пра выхаванку дзіцячай школы мастацтваў Дар’ю Сарапас. Напрыканцы сакавіка яна прымала ўдзел у адкрытым форуме цымбалістаў “Сярэбраны звон цымбалаў”, які праходзіў у Маладзечне, і заняла там першае месца. Па сутнасці гэта быў рэспубліканскі агляд-конкурс маладых выканаўцаў — навучэнцаў музычных навучальных устаноў Рэспублікі Беларусь. У лік яго ўдзельнікаў наша юная зямлячка трапіла пасля паспяховага выступлення на абласным узроўні, яшчэ тады дзяўчынку прыкмеціў прафесар акадэміі музыкі Яўген Гладкоў і правёў з ёю майстар-клас.
— Даша Сарапас, — расказвае выкладчык школы мастацтваў па класу цымбалаў Людміла Клімчык, — займаецца са мной з пяці гадоў, і ўжо з самага пачатку яна праявіла рэдкую для такога ўзросту працавітасць, настойлівасць і дысцыплінаванасць. Працаваць з ёю — адно задавальненне: усе ўрокі, усе рэкамендацыі і парады яна ўбірае ў сябе, быццам губка. Яна заўсёды акуратна наведвае заняткі, яна шмат працуе дома, у чым вялікая і несумненная заслуга яе бацькоў — Дзмітрыя Віктаравіча і Ірыны Дзмітрыеўны. Зрэшты, Дашу ў яе занятках музыкай падтрымлівае ўся іх вялікая і дружная сям’я. Акрамя таго, нам вельмі пашанцавала з акампані-ятарам — Вольгай Васільеўнай Хацько: калі трэба, мы сустракаліся і праводзілі заняткі і ў выхадныя дні, і дома ў вучаніцы, і заўсёды наша канцэртмайстар праяўляла разуменне, гатоўнасць, давала вельмі слушныя парады са свайго боку. Я лічу, што толькі такое сумеснае супрацоўніцтва і дазволіла нам выйсці на рэспубліканскі ўзровень і атрымаць, не, правільней сказаць, заваяваць перамогу, бо ўзровень канкурсантаў быў сапраўды вельмі высокім.
Яшчэ дададзім, што Даша Сарапас прымала ўдзел у гала-канцэрце разам з лепшымі выканаўцамі, ансамблямі, музыкантамі. Сярод трынаццаці зноў жа лепшых нумароў фестывалю скерца Юрыя Чычкова “Наташка-первоклашка” ў выкананні нашай юнай цымбалісткі было прынята дружнымі апладысментамі.
Таццяна ЛУКАШЭВІЧ
Фота Сяргея РУДЗІНСКАГА
