Нарады бываюць рознымі: планавымі, нечарговымі, пашыранымі, а калі здараецца так, што іх правядзенне прыпадае на дзень прафесійнага свята, то тут зразумела, што парадак дня будзе адпаведным — святочным. Васямнаццатага мая адбылася нечарговая нарада работнікаў фізічнай культуры і спорту пад старшынствам начальніка аддзела фізкультуры, спорту і турызму Глускага райвыканкама Ігара Сушчэні. У парадку дня было ўзнагароджанне лепшых работнікаў за значны асабісты ўклад у развіццё галіны і ў сувязі з Днём работнікаў фізічнай культуры і спорту, які адзначаўся якраз у гэты дзень. Першым падзяку аддзела за значны ўклад у выхаванне падрастаючага пакалення і дасягнутыя высокія вынікі атрымаў Сяргей Зайцаў. Граматамі аддзела фізкультуры, спорту і турызму райвыканкама ўзнагароджаны Анатоль Мішур, Віктар Вежнавец, Аляксандр Маюрнікаў, Канстанцін Сцепчанка, Юрый Алёхна, Ірына Башкевіч, Анатоль Бондараў і Ігар Бараноўскі, дарэчы, выхаванцы апошніх двух спецыялістаў уваходзяць у склад зборных каманд Магілёўскай вобласці і вучацца ў вучылішчы Алімпійскага рэзерву. Падзячнымі лістамі адзначана работа трэнераў Галіны Алёхны і Валянціна Сокала, а таксама бухгалтараў аддзела Людмілы Лысянковай і Люд-мілы Пількевіч. Маладыя спецыялісты Вераніка Гапчый і Уладзімір Гаравікоў былі ўдастоены заахвочвання ў выглядзе прэміі.
Ігар Сушчэня сардэчна падзякаваў усім за работу па прыцягненні дзяцей, падлеткаў і дарослага насельніцтва да заняткаў фізічнай культурай, за добрыя спартыўныя поспехі выхаванцаў спартыўнай школы і спартыўнага клуба. За час работы ў асобнай структуры шмат зроблена ў накірунку прапаганды актыўных формаў адпачынку і здаровага ладу жыцця сярод насельніцва раёна. Ігар Сушчэня выказаў спадзяванне, што і ў структуры адукацыі, куды неўзабаве будуць пераведзены спартсмены раёна, яны таксама будуць працаваць старанна, адказна, на высокія канчатковыя спартыўныя вынікі.

Т. ЛУГАВАЯ
Фота С. РУДЗІНСКАГА