“Добры вечар, шчодры вечар усім людзям на ўвесь вечар!” — гэтымі словамі віталі жыхароў аграгарадка Завалочыцы вечарам 13 студзеня калядоўшчыкі. З каляднымі песнямі і пляскамі, жартамі і шчырымі віншаваннямі ішла Каляда па шырокіх вясковых вуліцах, калядную зорку — сімвал свята — з сабой несла, заходзіла ў некаторыя дамы вяскоўцаў. Зычыла ім, каб у малых і дарослых увесь год настрой быў добрым, каб у сем’ях былі лад і дабрабыт, каб здаровыя ўсе былі, будучы ўраджай не падвёў і ў хляве заўсёды было поўна.

У ролі артыстаў-калядоўшчыкаў — работнікі Завалочыцкага сельскага Дома культуры Людміла Навіцкая, Вольга Фешчанка, Таццяна Міроненка, а таксама ўдзельнік мастацкай самадзейнасці Генадзь Ціцішын. І куды ні заходзіла гэта вясёлая кампанія, усюды яе з радасцю сустракалі, бо не пускаць калядоўшчыкаў у хату лічыцца дрэннай прыкметай, таму разам з гасцямі гаспадары танчылі і спявалі, ад душы рознымі прысмакамі частавалі.

З Калядою ішла Каза, бо “дзе каза бывае — там шчасце чакае, дзе яна ходзіць — там жыта родзіць”, яна ўвесь час скакала і весяліла гаспадароў, кланялася ім, а пасля падала на падлогу, нібыта, памірала. Каб яна паднялася, а ў гаспадароў жыццё было як у казцы, ёй давалі кавалак сала ці каўбасы. А пасля вясёлая Цыганка варажыла на лёс, прадказвала шчаслівую будучыню, толькі трэба было абавязкова пазалаціць ёй ручку — бо не ўся праўда адкрыецца. У гэтым годзе з пажаданнямі шчаслівага лёсу ў вясковыя дамы прыйшоў і сімвал года — Бычок. З сабою ён прынёс поспех і дабрабыт. На развітанне калядоўшчыкі сыпалі зернем ва ўсе куткі, каб гаспадары жылі ладна і багата.

І хоць зараз часы змяніліся, Каляды святкуюць не так, як раней, і, на жаль, не ўсе падтрымліваюць традыцыі, аднак добразычлівасць, шчырасць, здаровы гумар і аптымізм, павага ў адносінах да людзей і вера ў лепшае ўсё ж такі з намі застаюцца.

Г. АЎТУХОВА

Фота аўтара