Глускія майстры прынялі ўдзел і атрымалі дыпломы ХII Рэспубліканскага фестывалю-кірмашу народных мастацкіх рамёстваў “Вясновы букет”
Майстры Глускага раённага Дома рамёстваў прынялі ўдзел і атрымалі дыпломы ХII Рэспубліканскага фестывалю-кірмашу народных мастацкіх рамёстваў “Вясновы букет”.
Свята адбылося напрыканцы мая, 29-га, у Мінску. Гэты фестываль народнай творчасці штогод збірае з усёй Беларусі майстроў, якія займаюцца традыцыйнымі рамёствамі: ганчарствам, ткацтвам, вышыўкай, кавальствам, разьбой па дрэве, глінянай цацкай і шмат чым іншым. Іх вырабы можна набыць, а можна паспрабаваць зрабіць уласнымі рукамі падчас майстар-класаў.
Магілёўшчыну на фестывалі-кірмашы прадстаўлялі больш за 70 майстроў, многія, у тым ліку глушчане, былі са сваімі вучнямі і пераемнікамі. Так, сямейны падрад даўно склаўся ў сям’і Меснік, дзе гаспадар Аляксей займаецца лазапляценнем і прывучае да рамяства сына Яна, а гаспадыня Соф’я — майстар па аплікацыі саломкай, на фестывалі яна была не толькі з мужам і сынам, а і са сваёй вучаніцай Вольгай Цагельнік. Бондар Уладзімір Станкевіч узяў на фестываль унука і вучня Яраслава. Ніколь Пікуліна дэманстравала свае керамічныя вырабы, Наталля Грашчанка — тканыя сурвэткі, рушнікі, абрусы, а на майстар-класе яна вучыла ўсіх жадаючых, як прасці ніткі. Як бачым, Глушчына даволі сур’ёзна і, так бы мовіць, маштабна прадставіла сябе на фестывалі, ну і вынік таксама неблагі. Майстар бандарнага рамяства Уладзімір Станкевіч узнагароджаны дыпломам 1-й ступені, а сям’я Меснік атрымала агульны, сямейны, дыплом 2-й ступені.
Застаецца толькі дадаць, што гэта не адзіныя ўзнагароды ў гэтым годзе. Так, у студзені кіраўнік Глускага раённага Дома рамёстваў Соф’я Меснік атрымала дыплом на рэспубліканскай выставе сучаснага народнага мастацтва “Калядныя ўзоры”, дзе прадстаўляла свае вырабы, аздобленыя аплікацыяй з саломкі. А з пачаткам лета ў рамеснікаў настае і ўвогуле гарачая пара, бо менавіта на цёплы сезон прыпадае большасць фестываляў, конкурсаў, святаў. Напрыклад, зараз у Доме рамёстваў рыхтуюцца да Купалля ў Александрыі, там, акрамя ўсяго іншага, будзе прэзентавана адмысловая, з глускім каларытам, калекцыя з дзесяці ручнікоў.