Адна з важных кропак жніва ў любой гаспадарцы — зернесушыльны комплекс. Менавіта сюды звозяць усё намалочанае камбайнамі збожжа на яго дапрацоўку. Вось чаму вельмі важна, каб людзі, што тут працуюць,  былі разваротлівымі і адказнымі, ведалі сушыльную ўстаноўку, маглі падрыхтаваць і наладзіць яе так, каб працавала без збояў.

Менавіта такія аператары сушыльных установак у Глускім райаграпрамтэх-забеспячэнні, гэта Сяргей і Міхаіл Ніканенкі. Сяргей Аркадзевіч на сушылцы працуе ўжо 16 гадоў, таму ці дзіўна, што ведае справу дасканала і вучыць гэтаму свайго маладзейшага напарніка. Бацька і сын у пары працуюць трэці сезон. Летась яны апрацавалі 2961 тону ўмоўнай колькасці зерня і ўвайшлі ў лік перадавікоў. Сяголета таксама стараюцца рабіць усё якасна і хутка. Устаноўку да сезона падрыхтавалі загадзя, таму як толькі з палёў сталі вазіць зерне, у работу ўключыліся і яны, з 29 чэрвеня. З таго часу рабочы дзень аператараў, як, мабыць, і ўсіх удзельнікаў жніва, доўжыцца гадзін па 12, і кожная напоўнена клопатамі.

На сушылцы работа кіпіць, у гэтым мы упэўніліся, прыехаўшы туды ў мінулую пятніцу раніцай. Аператары Сяргей і Міхаіл Ніканенкі завіхаліся каля сушылак (іх тут дзве) і для фатаграфавання згадзіліся пакінуць работу толькі на некалькі хвілін. Бліжэй да сушылкі падсоўваў “Амкадорам” збожжа Васіль Пракопчык, уручную зярняты шуфлявалі паляводы Анатоль Юрэвіч і  Станіслаў Шчэрба. Анатоль Адамавіч ужо на пенсіі, але згадзіўся дапамагчы, сюды, на сушылку каля Хваставіч, ездзіць з Турыно, а Станіслаў вучыцца ў Любані на токара, але на канікулах вырашыў папрацаваць, дапамагчы гаспадарцы, дзе працуюць маці і старэйшы брат. Ілья Шчэрба заняты на лініі ачысткі насення.

Увесь калектыў, хто працуе на сушылцы, на складзе, склаўся дружны, расказвае кладаўшчык і маці Стаса і Ільі Алена Туміловіч, ад працы ніхто не адлыньвае.

“З Сяргеем Аркадзевічам Ніканенкам мы тут працуем ужо гадоў 13, гэта залаты чалавек, і рукі ў яго залатыя, яго сын Міхаіл добра дапамагае бацьку, — кажа яна. — Тут, скажам, не вельмі лёгка, пыл, шум, ручной працы шмат, але людзі стараюцца, пачынаючы ад аператараў да тых, хто заняты на падсобных работах. Добра, што вы прыехалі і напішаце пра іх, яны гэта заслужылі”.

Так, заслужылі. Цягам гэтага жніва ў райаграпрамтэхзабеспячэнні намалацілі больш за 2200 тон збожжа, 1620 тон апрацавана (ачышчана і высушана) тут, на сушыльным комплексе. І гэта іх агульнае дасягненне.

Т. ЛУКАШЭВІЧ

Фота М. БУЯНА