Людзі і тэхніка шчыруюць на палях Глускага раёна

Надвор’е спрыяе, і аграрыі не марнуюць час. Гаспадаркі актыўна вывозяць на палі арганічныя ўгнаенні пад яравую сяўбу: пры плане 189 тысяч тон яго вывезена амаль 139 тысяч тон, пры гэтым “Турыно-агра” свой план (18 тысяч тон) выканала і перавыканала. Унесена ў глебу пад веснавую сяўбу 29 тысяч тон арганічных угнаенняў, самы большы паказчык на рахунку райаграпрамтэхзабеспячэння — каля 16 тысяч тон.

Актыўна зараз уносяцца ў глебу і калійныя ўдабрэнні: пад яравую сяўбу (зерневых і кукурузы) яны ўнесены амаль на 6 тысячах гектараў, на шматгадовыя травы і пашы калій унесены на плошчы больш як 3800 гектараў.

Больш таго, на пашах ужо пачалі падсяваць шматгадовыя травы: “Турыно-агра”, “Глуская Зара” і РАПТЗ падсеялі 140 гектараў.

Амаль усе гаспадаркі раёна правялі першую падкормку азімага рапсу: пры плане 400 гектараў работы на ўчарашнюю раніцу былі выкананы на 310 гектарах. Пачалася і першая падкормка азімых зерневых культур на зерне: падкормлена 259 гектараў, усяго ж гэтай вясной неабходна падкарміць 6105 гектараў зерневых.

Інфармацыя падрыхтавана па даных упраўлення па сельскай гаспадарцы і харчаванні на 10 сакавіка

Т. ЛУГАВАЯ

Фота А. ЗМІТРОВІЧ