У Глускім раёне прайшлі засеўкі
У Глускім раёне 20 красавіка прайшлі засеўкі. Звычайна на Глушчыне пасяўная пачынаецца даволі рана, але ў гэтым годзе ў гаспадарках раёна акцэнт зроблены на вырошчванне кукурузы, якую сеюць акурат з апошняй дэкады красавіка. На полі Глускага райаграпрамтэхзабеспячэння сабраліся кіраўнікі і спецыялісты гаспадарак, прадстаўнікі “БНБК-агра”, раённага ўпраўлення па сельскай гаспадарцы і харчаванні. “Мы ўсе разам шмат папрацавалі яшчэ да таго, як сабраліся сёння тут, — згадала ў сваім выступленні кіраўнік “БНБК-агра” Надзея Каткавец. — Падрыхтавалі палеткі, ўнеслі ўгнаенне і ўдабрэнне, наладзілі тэхніку. Спадзяюся, што і далей мы ўсе разам будзем працаваць таксама добра і якасна, каб наша агульная праца дала плён”. Пасля таго як насенне кукурузы было засыпана ў новенькую сеялку, зерне, зямлю і тэхніку асвяціў протаіерэй Міхаіл, настаяцель глускай Свята-Богаяўленскай царквы. Пакуль сеялка пракладала першыя барозны, на добры ўраджай гучалі песні і пажаданні ў выкананні народнага калектыву “Вярбічанька”.
