Спявала, радавалася і цешылася душа былой настаўніцы беларускай мовы і літаратуры, мая душа, слухаючы, як школьнікі чыталі вершы па-беларуску, вершы класікаў беларускай літаратуры, маладых аўтараў, слухаючы тое, што ведаю, што вучыла і чаму вучыла некалі сама, і тое, чаго чуць і ведаць не давялося. У Глуску прайшоў раённы этап конкурсу юных чытальнікаў “Жывая класіка”, у ім удзельнічаў сорак адзін навучэнец з першага па дзясяты клас СШ № 1, СШ № 2, гімназіі, Завалочыцкай, Заеліцкай, Каткаўскай, Усцярхоўскай, санаторнай школ, а таксама выхаванцы Цэнтра творчасці.

Сяголета конкурс прысвечаны Году гістарычнай памяці, і праводзіўся ён, каб павысіць цікавасць дзяцей да чытання, пашырыць іх чытацкі кругагляд, задзейнічаць высокую выхаваўчую сілу лепшых узораў нацыянальнай літаратуры з яе высокімі маральнымі каштоўнасцямі, падкрэсліла метадыст навучальна-метадычнага кабінета аддзела па адукацыі, спорце і турызме райвыканкама Наталля Някрасава.

Да конкурсу добра падрыхтавалася гімназія як прымаючы бок: сцэна, на якую выходзілі чытальнікі, была аформлена ў народна-побытавым стылі, а ў той час, калі журы падводзіла вынікі выступлення чарговай узроставай катэгорыі, на экране дэманстраваліся беларускія мультфільмы. Да конкурсу добра падрыхтаваліся самі чытальнікі, іх школы, іх настаўнікі. Настаўнікам асобны дзякуй: за падбор твораў, за стварэнне вобразаў (касцюмы, музычнае суправаджэнне, відэарад), а найперш — за падрыхтоўку вучняў: дзеці чыталі прачула, выразна, імкнуліся данесці сэнс і настрой вершаў, усе яны вельмі стараліся. У лістах з прозвішчамі ўдзельнікаў насупраць кожнага я так і напісала: “Выразна, вельмі стараўся…” А творы, між іншым, былі няпростыя, эмацыйна напружаныя — “Балада аб чатырох заложніках”, “Цяжкое партызанскае качэўе”, “Вайна”, “Зварот музыканта”, “Балада аб спаленай вёсцы і жывым пеўні”… І дзеці праўда вельмі стараліся, хваляваліся, але чыталі з разуменнем, даносілі аўтарскі пасыл інтанацыяй, сілай голасу, тэмпам і рытмам чытання.

Падводзячы вынікі, загадчыца навучальна-метадычнага кабінета Таццяна Грыгор’ева таксама адзначыла добрую падрыхтоўку юных чытальнікаў, падзякавала ім за ўдзел у конкурсе, а прызёрам уручыла дыпломы адпаведных ступеняў. Узнагароды ўдзельнікі атрымлівалі, як і выступалі, у чатырох узроставых групах.

У малодшай групе (1—4-я класы), яна была найбольш масавай — 16 чалавек, дыпломам 1-й ступені ўзнагароджана Злата Аўчыннікава, гімназія, настаўнік Алена Канстанцінаўна Кулінок. Дыпломы 2-й ступені атрымалі Аляксей Касько, гімназія, Валерыя Зязюлькіна, СШ № 2, Сафія Данілава, Усцярхоўскі НПК. Дыпломы 3-й ступені заслужылі Андрэй Хлістуноў, Завалочыцкі НПК, і Кірыл Дарошка, СШ № 2.

Сярод навучэнцаў 5—6-х класаў першае месца і дыплом 1-й ступені прысуджаны Ангеліне Масюк, СШ № 2, настаўнік Вікторыя Віктараўна Падалінская. На другім месцы Сафія Сідаровіч з Заеліцкага НПК, на трэцім — Ягор Лось з гімназіі.

У наступнай узроставай катэгорыі, 7—8-я класы, дыпломам 1-й ступені ўзнагароджана Вікторыя Падгорная, Завалочыцкі НПК, настаўнік Наталля Віктараўна Лінкевіч. Дыпломы 2-й ступені заваявалі Ксенія Пракоф’ева, СШ № 2, і Ганна Будаева, Заеліцкі НПК. Трэцяе месца занялі Сцяпан Касцюкевіч, гімназія, і Лізавета Лёзава, Усцярхоўскі НПК.

Даволі масава, 11 удзельнікаў, была прадстаўлена і самая старшая ўзроставая катэгорыя чытальнікаў, пры гэтым якасць выканання тут адзначана таксама высокая. Пераможцай сярод навучэнцаў 9—10-х класаў прызнана Уладзіслава Смушкова, Заеліцкі НПК, настаўнік Ірына Віктараўна Пукач. Дыпломамі 2-й ступені ўзнагароджаны Дар’я Ларына, Заеліцкі НПК, і Надзея Стругавец, Завалочыцкі НПК. Дыпломы 3-й ступені атрымалі Руслана Дуброўская, СШ № 2, Дар’я Мышкавец, гімназія, Карына Ляпеева, санаторная школа-інтэрнат.

Неўзабаве пасля раённага этапа конкурсу юных чытальнікаў “Жывая класіка” адбыўся абласны этап. Сярод мэт конкурсу былі таксама пошук і падтрымка таленавітай моладзі. На маю думку, такая тале-навітая моладзь была знойдзена. У ліку больш як дзевяноста ўдзельнікаў з усіх раёнаў вобласці Глушчыну там прадстаўлялі нашы юныя таленты Злата Аўчыннікава, Ангеліна Масюк, Вікторыя Падгорная, Уладзіслава Смушкова. Уладзіслава Смушкова, дзевяцікласніца Заеліцкай школы, з баладай Лёлі Багдановіч “Галубка” на абласным этапе конкурсу ў сваёй узроставай групе заняла  трэцяе месца. Рады за яе, ганарымся ёю і яшчэ раз дзякуем настаўніцы Ірыне Віктараўне Пукач.

Т. ЛУГАВАЯ

Фота аўтара і дадзена раённым аддзелам па адукацыі