На мінулым тыдні ў аграгарадку Калацічы работнікі культуры наладзілі свята для мясцовых жыхароў. У праграме былі канцэрт, гульні і забаўкі для дзяцей, святочная дыскатэка, а ўвогуле мерапрыемства стала добрай нагодай сустрэцца аднавяскоўцам, родзічам, знаёмым, пабачыць тых, хто жыве на далёкіх вуліцах, пагутарыць. Бо летам у сяле, няхай яно і завецца аграрным гарадком, звычайна не да доўгіх размоў і прагулак: градкі, ягады, грыбы, у каго кароўка з куркамі ды свінкамі — усё гэта трэба дагледзець, паліць-прапалоць-выбраць, пасля яшчэ на зіму ў банкі пакласці…

Пятнічным вечарам людзей сабралася шмат, сядзелі ў імправізаванай глядзельнай зале, стаялі купкамі ў цянёчку, а колькі малых было на дзіцячай пляцоўцы! Пакуль мамы, таты, бабулі з дзядулямі глядзелі канцэрт, яны скакалі на скакалцы, бегалі, хто хутчэй, круцілі хулахуп, гулялі ў розныя гульні. Толькі пазайздросціць па-добраму можна было, колькі энергіі, бадзёрасці і добрага настрою малыя з сабой неслі — гэты пазітыў адчуваўся амаль фізічна. Дзяўчаты, што праводзілі на пляцоўцы гульні, ужо крыху і стаміліся, а дзецям хоць бы што, здаецца, так бы да раніцы і скакалі.

Дарослыя, як водзіцца, былі больш стрыманымі, але для артыстаў апладысментаў не шкадавалі. Канцэрт “За Беларусь” падрыхтавалі работнікі раённага Цэнтра культуры і мясцовыя самадзейныя артысты. Гучалі песні на ўсе густы, і сучасныя, і колішнія, прычым зараз жа модна перапяваць старыя мелодыі, такія “наватворы” карыстаюцца папулярнасцю ў моладзі. Так што гледачы падпявалі, пляскалі ў далоні, некаторыя і на падтанцоўку выйшлі. А чаму і не? Чаму маладым хлопцам годна не патанчыць ці мужу не запрасіць жонку на танец?

Адным словам, свята ў Калацічах прайшло ўдала. І пайшло далей: ужо ў суботу артысты радавалі жыхароў Каткі, а ўвогуле такія мерапрыемствы запланаваны да канца лета і ў іншых вёсках раёна.

А. ВАСІЛЕЎСКАЯ

Фота аўтара