Выстава, прымеркаваная да пасхальных святаў, адкрылася ў фае раённага Дома культуры і будзе працаваць да канца месяца. На ёй прадстаўлены вырабы майстроў і выхаванцаў Заеліцкага Дома рамёстваў, выкананыя ў розных тэхніках. Тут дываны і ручнікі, аздобленыя аплікацыяй з саломкі, тканыя ручнікі і паясы, вязаныя кручком сурвэткі і шмат іншага, што прадстаўляе цікавасць для аматараў народных рамёстваў. Асобны стэнд займаюць вышыўкі Аксаны Харытонавай, педагога Заеліцкага філіяла раённага Цэнтра творчасці.

Дарэчы, выставу гэтую арганізавалі не толькі дзеля таго, каб людзі маглі паглядзець на рукатворную прыгажосць. Дырэктар Дома рамёстваў Соф’я Меснік (на здымку) і майстар-метадыст па ткацтве Наталля Грашчанка праводзяць для дзяцей і падлеткаў майстар-класы па роспісе пасхальных яек і вырабе паясоў. Мы заспелі як раз такі момант, калі на выставу прыйшлі выхаванцы старэйшай групы дзіцячага садка № 1 Глуска. Цікава, што каля ткацкага станка сабраліся ў асноўным хлопчыкі, і Наталля Грашчанка потым у размове заўважыла, што так бывае заўсёды, дзе б яна ні праводзіла майстар-класы. Ад жадаючых распісаць яркімі кветкамі ці арнаментам яйкі адбою таксама не было. Канешне, з малымі дзецьмі больш складана працаваць, гавораць майстры, ім трэба тлумачыць усё даступна для іх узросту, але затое яны непасрэдныя ў сваіх эмоцыях і не саромеюцца задаваць пытанні, калі што не зразумелі. Наконт эмоцый згодна: дзеці вельмі шчыра дзякавалі рамесніцам за цікавую выстаўку і майстар-класы, а яшчэ за прыгожыя сувеніры, якія атрымаў кожны з малых.

Алена ВАЛОШКА

Фота аўтара