У мінулую пятніцу ўжо з раніцы ў фае “Арыёна” было мнагалюдна, па-асабліваму светла і цёпла — не толькі ад ласкавага летняга  сонца, якое шчодра лілося праз панарамныя вокны, але і ад шчырых усмешак і радасных прывітанняў: настаўнікі раёна збіраліся на традыцыйную жнівеньскую педагагічную канферэнцыю. Да гэтай сустрэчы ўстановы адукацыі падрыхтавалі прыгожыя прэзентацыі. Прысвечаны яны былі адной тэме — Году беларускай жанчыны. А падыходы і напаўненне ва ўсіх розныя, бо чаго-чаго, а творчай думкі, палёту фантазіі педагогам не пазычаць: тут і фатаграфіі, і маляўнічыя альбомы, і лялькі-мотанкі, і ўпрыгажэнні ручной работы.

У зале сярод ганаровых гасцей — старшыня раённага Савета дэпутатаў Раман Тычына і намеснік старшыні раённага выканаўчага камітэта Анатоль Ласоцкі. Звяртаючыся да прысутных, Анатоль Міхайлавіч падкрэсліў важнасць ведаў: да кожнага вучня настаўнікі павінны данесці думку, што веды патрэбны, каб прыносіць карысць сваёй сям’і, свайму раёну, сваёй краіне. Нездарма сяголета тэма адзінага ўрока, які пройдзе ва ўсіх школах краіны 1 верасня, — “Веды сёння — сіла і росквіт Беларусі заўтра!”. Намеснік старшыні райвыканкама падзякаваў усім педагогам, выхавацелям, работнікам школ і дзіцячых садоў за тую вялікую работу, якую яны правялі, каб падрыхтаваць свае ўстановы да сустрэчы з дзецьмі. Ён выказаў упэўненасць, што 1 верасня яны ўсе адчыняць свае дзверы і стануць для нашых дзяцей камфортнай і ўтульнай прасторай, дзе будуць раскрывацца дзіцячыя здольнасці і таленты. Анатоль Ласоцкі павіншаваў педагагічную супольнасць раёна з пачаткам новага навучальнага года, пажадаў моцнага здароўя і ўдзячных вучняў, вучняў, у якіх настаўнікі могуць верыць, якімі яны  могуць ганарыцца.

За шматгадовую добрасумленную працу, значны асабісты ўклад у развіццё сістэмы адукацыі раёна Анатоль Ласоцкі ўручыў Падзякі Глускага раённага выканаўчага камітэта настаўніцы біялогіі гімназіі Таццяне Сачэнка, маці-выхавацелю дзіцячага дома сямейнага тыпу Святлане Кандрацені, кіраўніку па ваенна-патрыятычным выхаванні гімназіі Міхаілу Гурыну.

Кожная педагагічная нарада ў жніўні — гэта не проста час, калі перагортваецца чарговая старонка, гэта асаблівы рубеж, калі важна аб’ектыўна ацаніць свае рэсурсы, убачыць кропкі росту і вызначыць, як эфектыўна рухацца далей. У сваім выступленні перад калегамі начальнік аддзела па адукацыі Аляксандр Леўчанка падвёў вынікі работы сістэмы адукацыі за 2025/2026 год. Ён адзначыўся перамогамі, дасягненнямі вучняў і настаўнікаў на прадметных алімпіядах, удалым паступленнем выпускнікоў, але паказаў і вузкія месцы, калі пры здачы экзаменаў не ўсе вучні пацвердзілі свае гадавыя школьныя адзнакі. Усё гэта паказвае тыя накірункі, па якіх варта прыбавіць, прыкласці большыя намаганні. Сілы і рэсурсы для гэтага ёсць. Аддаючы даніну павагі настаўнікам, начальнік аддзела па адукацыі адзначыў асаблівую ролю жанчын: на педагагічнай ніве раёна працуюць 250 прадстаўніц прыгожай паловы, 11 з іх — з’яўляюцца кіраўнікамі, 14 — шматдзетнымі мамамі. Аляксандр Леўчанка пажадаў настаўнікам моцнага здароўя, натхнення, творчых пошукаў і знаходак, каб работа прыносіла радасць і задавальненне, а кіраўнікам навучальных устаноў уручыў узнагароды.

За поспехі ў навучанні і выхаванні падрастаючага пакалення, развіццё матэрыяльнай базы ўстаноў Ганаровымі граматамі аддзела па адукацыі Глускага райвыканкама адзначаны дырэктар Завалочыцкай СШ Наталля Шылава, дырэктар Заеліцкай СШ Дзмітрый Махуноў, дырэктар СШ № 1 імя Сяргея Грахоўскага Людміла Маеўская, загадчыца дзіцячага сада № 4 Ірына Леўчанка, дырэктар гімназіі Сяргей Сяргееў, дырэктар Цэнтра карэкцыйна-развіваючага навучання і рэабілітацыі Анастасія Піліповіч, загадчыца Калаціцкага дзіцячага сада Вольга Апухоўская, дырэктар СШ № 2 імя Івана Захарэнкі Алена Слічонак, загадчыца дзіцячага сада № 3 Алена Кісялевіч, намеснік загадчыка дзіцячага сада № 1 Алена Макарава, дырэктар Цэнтра творчасці Марыя Сяргеева, дырэктар Усцярхоўскай СШ Віктар Сасноўскі.

Цёплыя і кранальныя словы калегам адрасавала старшыня раённай арганізацыі прафсаюза работнікаў адукацыі і навукі Алена Ахрэмчык, яна асобна звярнулася і сказала словы падзякі тым, хто працуе сёння ў дзіцячых садках і школах, чыя штодзённая работа мала прыкметная, але многа значыць, падзякавала тым, хто працаваў у ранейшыя гады і закладваў падмурак цяперашняй сістэмы адукацыі. А маладым спецыялістам параіла не баяцца цяжкасцей, не адмаўляцца ад старых методык і прыўносіць у работу новае, перадавое. “Няхай у вас усё атрымаецца!” — сказала Алена Ахрэмчык і таксама ўручыла ўзнагароды. За актыўную і плённую работу па ахове сацыяльна-эканамічных правоў і законных інтарэсаў членаў прафсаюза Ганаровай граматай Магілёўскага абласнога камітэта Беларускага прафсаюза работнікаў адукацыі і навукі ўзнагароджана пярвічная прафсаюзная арганізацыя Калаціцкага дзіцячага сада. Граматы Магілёўскага абкама галіновага прафсаюза педагогаў атрымалі старшыня пярвічнай прафсаюзнай арганізацыі раённага сацыяльна- педагагічнага цэнтра педагог-псіхолаг Надзея Марозава, старшыня пярвічнай прафсаюзнай арганізацыі дзіцячага сада № 3 кіраўнік па фізвыхаванні Таццяна Коўганава. Падзяка абласнога камітэта галіновага прафсаюза ўручана настаўніцы выяўленчага мастацтва гімназіі Алене Пятровай.

Кветкі, падарункі і шчырыя апладысменты ад калег прымалі ганаровыя госці педканферэнцыі — ветэраны педагагічнай працы. Дружнымі апладысментамі зала сустракала маладых спецыялістаў, што сяголета папоўнілі рады настаўнікаў і выкладчыкаў. Гэта Дана Сушкевіч — настаўнік англійскай мовы гімназіі, Наталля Гаравікова — настаўнік пачатковых класаў Заеліцкай СШ, Мікіта Кісялевіч — настаўнік фізкультуры Усцярхоўскай СШ, Валерыя Ляпко — выхавацель дзіцячага сада № 4, Карына Красоўская — настаўнік харэаграфіі дзіцячай школы мастацтваў імя Валерыя Іванова, Лізавета Аксёнава — настаўнік выяўленчага мастацтва ДШМ, Міхаіл Алёхна — інструктар-метадыст па фізкультурна-аздараўленчай і спартыўна-масавай рабоце ФСК, Кірыл Грамыка — трэнер-выкладчык па баскетболе ДЮСШ.

Ні адзін самы сучасны падручнік не заменіць жывой мудрасці і шматгадовага вопыту сапраўдных майстроў сваёй справы. “Хутка 1 верасня, вы перагортваеце першую старонку свайго настаўніцкага жыцця, — сказала, звяртаючыся да маладых педагогаў, ветэран педагагічнай працы Галіна Пятроўна Шуміна. — Гэта высародная прафесія — даваць веды, адкрываць дзецям свет, выводзіць іх на шырокую дарогу жыцця. Якой будзе гэтая дарога, у многім залежыць ад вас. Не бойцеся, калі чагосьці не ведаеце, звяртайцеся да старэйшых, і вам дапамогуць, падкажуць. Будуць і памылкі, без іх не абысціся, але іх не варта баяцца, на іх трэба вучыцца. Мы верым у вас, і вы верце ў сябе!”

Прыгожыя словы, прыгожыя людзі, прыгожыя канцэртныя нумары, песенныя, музычныя, танцавальныя, кранальныя відэападборкі. Так, настаўнікі вучаць дзяцей разумнаму, добраму, вечнаму, але і самі ўмеюць здзіўляць сваімі талентамі, ствараць прыгожае. Усё гэта прадэманстравала жнівеньская педагагічная канферэнцыя. Яна быццам вывела на фінішную прамую перад 1 верасня. Гэты звычайны восеньскі дзень школы і настаўнікі ператвараюць для ўсіх нас у сапраўднае свята.

Т. ЛУКАШЭВІЧ

Фота І. ГРАМЫКІ