Да пасхальнага стала
Больш за сем тон святочнай прадукцыі выпякуць сяголета мясцовыя кандытары і хлебапёкі да Вялікадня. Пакупнікам будуць прапанаваны куліч “Пасхальны з разынкамі”, куліч “Каралеўскі”, а таксама кексы “Уваскрэсенскі” і “Святочны”. Учора першая пасхальная выпечка ўжо паступіла ў гандлёвыя кропкі раёна. Сёння і заўтра будзе арганізаваны вынасны гандаль у цэнтры Глуска, ёсць заказы на гэту святочную прадукцыю з Бабруйска і Рагачова. Па словах начальніка аддзела прамысловасці Глускага райпо Вольгі Галінскай, у гэтыя дні ўчастак па вытворчасці хлеба пераходзіць на кругласутачны рэжым работы, зыходныя прадукты ёсць у неабходнай колькасці, так што недахопу кулічоў і кексаў пакупнікі адчуваць не будуць, кулінары гатовы выканаць усе падаваемыя заяўкі са стацыянарных магазінаў і аўтамагазінаў, нават калі яны перавысяць раней запланаваныя аб’ёмы. А каб форма прадукцыі адпавядала зместу свята, у чацвер настаяцель Свята-Богаяўленскага храма айцец Міхаіл правёў вадасвятны малебен і чын асвячэння печаў хлебазавода, благаславіўшы яго работніц на выпяканне пасхальных булак.
Т. ЛУКАШЭВІЧ
