Глуск 22 жніўня будзе прымаць удзельнікаў і гасцей рэгіянальнага фестывалю сямейнай творчасці “Сузор’е талентаў”
Ужо праз некалькі дзён Глуск будзе прымаць удзельнікаў і гасцей рэгіянальнага фестывалю сямейнай творчасці “Сузор’е талентаў”. У суботу 22 жніўня фестывальная пляцоўка ў чатырнаццаты раз аб’яднае сямейныя калектывы з розных куткоў Магілёўшчыны і не толькі.
Пачатак фестывалю быў пакладзены ў дзевяностыя гады, і адразу ж быў зададзены асаблівы настрой свята, утульны і добразычлівы, гэта заўжды адзначалі яго ўдзельнікі. Дарэчы, у асобныя гады фестываль праходзіў па два дні, і канкурсанты пасля выступленняў на галоўнай сцэне вечарам накіроўваліся ў вёскі раёна, каб парадаваць сваёй творчасцю сяльчан. Ці трэба казаць, што сустракалі іх там не менш горача, чым у Глуску? Сярод удзельнікаў конкурсу былі, дарэчы, не толькі беларускія калектывы. Напрыклад, у 2009-м і 2011-м да нас прыязджалі ў якасці канкурсантаў і гасцей калектывы з Чарнігаўскай вобласці Украіны, казачы ансамбль з Краснадарскага краю, артысты з Белгарада.
Конкурсы таксама адрозніваліся разнастайнасцю. Так, у розныя гады, акрамя мастацкіх, праводзіліся спаборніцтвы рыбаловаў і на лепшую сямейную юшку, на лепшы фітачай і лепшы кандытарскі выраб, сямейны абярэг. І ўвогуле, арганізатары фестывалю пры ўсёй яго традыцыйнасці кожны раз знаходзілі магчымасць дадаць новых яркіх фарбаў. Так, у 2011 годзе сваім выступленнем глушчан парадавала папулярная на той час група “3+2”, удзельніца ад нашай краіны на Еўрабачанні. А дзесяццю гадамі раней гледачоў захапіў сваім аўтэнтычным выкананнем старадаўніх песень ансамбль сям’і Манько з вёскі Ольніцы.
Сярод гасцей і членаў журы былі кампазітар Валерый Іваноў (старшыня журы), народны артыст Анатоль Ярмоленка, ганаровы грамадзянін Глуска Анатоль Глаз,
на той час намеснік старшыні аблвыканкама, між іншым, ён і на сцэне спяваў, падыгрываючы сабе на гітары, этнограф і фалькларыст Іван Крук, культуролаг Аксана Катовіч і іншыя.
А ў 2007 годзе падчас фестывалю “Сузор’е талентаў” у цэнтральным парку ўрачыста адкрылі Алею Славы.
На мерапрыемстве прысутнічалі Герой Сацыялістычнай працы Васіль Барысік і Герой Савецкага Саюза Ульян Рыбак. Ульян Аляксандравіч Рыбак і Аляксандр Багель, тагачасны старшыня Глускага райвыканкама, перарэзалі чырвоную стужку на цырымоніі адкрыцця.
У ліку пераможцаў і прызёраў фестывалю “Сузор’е талентаў” не адзін раз аказваліся сямейныя калектывы з нашага раёна: Рудалевічы, Сокалы, Каржнёвы, Шуманскія, Кісялевічы, Храпко, Дубашынскія-Сініцыны, Карпачовы, Янкоўскія, Ячмяньковы і шмат хто іншы.
Нямала глушчан ўдзельнічаюць і сёлета, перакананы, што іх выступленні будуць яркімі і цікавымі, запамінальнымі, як, зрэшты, і сам фестываль. Прыходзьце паглядзець, паслухаць, падтрымаць!
А. ВАСІЛЕЎСКАЯ
Фота з архіва рэдакцыі
