У парках і скверах Мінска больш не будуць прыбіраць апалае лісце. Аб гэтым паведаміў старшыня камітэта прыродных рэсурсаў і аховы навакольнага асяроддзя Мінгарвыканкама Аляксандр Баравікоў, перадае БелТА.«Прыбіраючы апалае лісце ў парках і скверах, чалавек парушае кругаварот рэчываў у прыродзе. Апалае лісце ўтварае перагной, які абагачае глебу, а мы прыбіраннем фактычна абядняем зямлю. Ад гэтага пачынаюць цярпець дрэвы», — сказаў Аляксандр Баравікоў.
Згодна з новым рашэннем лісце будуць зграбаць толькі за пяць метраў ад праезнай часткі, каб яно не перашкаджала руху аўтамабіляў, а таксама не забівала калодзежы ліўневай каналізацыі. Паводле слоў Аляксандра Баравікова, забарона на збор апалага лісця дапаможа не толькі захаваць экалагічны баланс, але і сэканоміць бюджэтныя сродкі.

Цікава, а ў нашым раёне падумаюць пра экалагічны баланс і эканомію бюджэтных сродкаў? Мяркуючы па колькасці дзён, людзей і тэхнікі “Жылкамгаса”, што працуюць у нашым цэнтральным парку амаль цэлую восень, эканомія і сапраўды была б значная, ва ўсялякім выпадку, у межах асобна ўзятага камунальнага прадпрыемства. А мяркуючы па тых брыдкіх праплешынах у парку, экалагічны баланс там д-а-а-ўно парушаны.