Агульная плошча гадавальніка Глускага лясгаса складае 10 гектараў, зараз тут, акрамя пяці асноўных лесастваральных парод, вырошчваецца больш за 20 розных відаў і формаў дэкаратыўных кустоў. Гэты гадавальнік і стаў першым аб’ектам наведвання ўдзельнікаў выязной калегіі Магі-лёўскага вытворчага лесагаспадарчага аб’яд-нання, якая прайшла на базе Глускага лясгаса на мінулым тыдні. Удзел у ёй узялі дырэктары і галоўныя інжынеры лясгасаў вобласці, узначаліў работу калегіі генеральны дырэктар лесагаспадарчага аб’яднання Уладзімір Раеўскі. Як распавяла інжынер па лесаўзнаўленні і меліярацыі Глускага лясгаса Алена Порсік, у гэтым годзе ў гадавальніку было вырашчана 3,8 мільёна штук пасадачнага матэрыялу, гэта сеянцы сасны (3,4 мільёна штук) і елкі (900 тысяч штук), а таксама саджанцы елкі для стварэння лясных культур (300 тысяч штук) і дакаратыўны пасадачны матэрыял (3 тысячы штук). З агульнага аб’ёму вырашчанага пасадачнага матэрыялу было атрымана 2 мільёны 300 штук сеянцаў з палепшанымі спадчыннымі ўласцівасцямі, падкрэсліла спецыяліст. Гэтай вясной з гадавальніка Глускага лясгаса было рэа-лізавана 410 тысяч штук пасадачнага матэрыялу сасны — у Чэрвеньскі лясгас і дуба — у Магілёўскі лясгас, агульная сума закупак склала больш за 14 тысяч рублёў. Яшчэ на 6 тысяч рублёў палепшанага насення сасны (15 кілаграмаў) у мясцовых лесаводаў закупіў Асіповіцкі лясгас. Як вырошчваецца пасадачны матэрыял у закрытым і адкрытым грунце, як уладкавана і дзейнічае сістэма арашэння, удзельнікам выязнога пасяджэння калегіі рас-казаў і паказаў галоўны ляснічы Глускага лясгаса Аляксей Бахановіч.

Наступным месцам наведвання стаў квартал 48 Глускага вопытна-вытворчага лясніцтва, дзе вялася распрацоўка сасновых насаджэнняў, пашкоджаных вяршынным караедам, і ўжо тут, на лесасецы, патлумачыў дырэктар лясгаса Сяргей Максімовіч, праводзіцца рассартаванне драўніны, якая потым, у адпаведнасці з гэтым, ідзе на перапрацоўку.

На прадпрыемстве вялікая ўвага надаецца і арганізацыі ўмоў працы праз абнаўленне матэрыяльнай базы, у прыватнасці, праз рамонт і будаўніцтва офісных памяшканняў для лясніцтваў. Прыклад гэтага ўдзельнікі выязнога пасяджэння пабачылі ў Заеліцы, дзе з’явіўся новы будынак Слаўкавіцкага лясніцтва. Гэта не толькі дабавіла зручнасці ўсім, хто тут працуе, але, без сумнення, упрыгожыла і сам аграгарадок, паколькі і будынак лясніцтва (яго будаўніцтва абышлося ў 419 тысяч рублёў), і добраўпарадкаваная вакол яго тэрыторыя сапраўды выглядаюць па-сучаснаму і прыгожа. Пасля пераезду ў Глуск удзельнікі выязной калегіі пабывалі ў цэху дрэваапрацоўкі лясгаса, а потым меркаваннямі і ўражаннямі ад усяго ўбачанага падзяліліся падчас пленарнага пасяджэння.

Т. ЛУКАШЭВІЧ

Фота С. РУДЗІНСКАГА