Напярэдадні Дня Незалежнасці віншаванні прымалі ветэраны Вялікай Айчыннай вайны
Напярэдадні Дня Незалежнасці віншаванні прымалі ветэраны Вялікай Айчыннай вайны.
Тых, хто мужна змагаўся з ворагам і здабываў для нас перамогу, засталося ў Глускім раёне, на жаль, няшмат: Ніна Уладзіміраўна Кульба, Валянціна Васілеўна Зайцава, Уладзімір Сцяпанавіч Званковіч, Васіль Уладзіміравіч Курс, Яўген Цімафеевіч Шылаў. Усе яны ў перадсвяточныя дні былі ў цэнтры ўвагі, іх віншавалі з галоўным святам краіны, дзякавалі за подзвіг і гераізм, цікавіліся надзённымі справамі, уручалі падарункі. На жаль, не ўва ўсіх ветэранаў нам, карэспандэнтам, удалося пабываць. Але там, куды трапілі разам са старшынёй раённага савета ветэранаў Валерыем Сураўнёвым і прадстаўнікамі арганізацый, дзе працавалі ветэраны, нас сустракалі шчыра, гасцінна, з непадробнай радасцю. Нягледзячы на даволі сталы ўзрост, ужо слабае здароўе, былыя франтавікі выглядалі бадзёра і аптымістычна.
Госці ад імя раённай улады дзякавалі за мірнае неба над галавой, за тое, што змагаліся і выжылі, жадалі ім моцнага здароўя, радасных дзён, дабрабыту, уручалі кветкі і падарункі. Расчуленыя, крыху ўсхваляваныя ветэраны былі ўдзячны за ўвагу, за тое, што іх ніколі не забываюць, што наведваюць. Ім ёсць што сказаць нашчадкам. Нямала жаху ім давялося перажыць на вайне. І хоць ідуць гады і вайна даўно ўжо скончылася, аднак не сціраюцца з памяці страшныя падзеі тых часоў. Трэба зрабіць усё, каб яны не паўтарыліся. А для гэтага, упэўнены ветэраны, патрэбна берагчы і захоўваць мір на зямлі, жыць у згодзе з сумленнем, у згодзе паміж людзьмі і народамі.
Г. АЎТУХОВА
Фота аўтара
