Работа без адрыву ад вучобы

Амаль сто сорак сем мільёнаў рублёў асвоены школьнікамі раёна ў рамках другаснай занятасці, якую штогод арганізоўвае ўпраўленне па працы, занятасці і сацыяльнай абароне насельніцтва. Адпаведныя дагаворы на пашыў мягкага інвентару яшчэ ў красавіку былі заключаны з аддзелам адукацыі і санаторнай школай. Дзяўчаты-старшакласніцы (узрост ад 14 да 16 гадоў) займаліся пашывам пасцельнай бялізны, ручнікоў, штор, рукавіц і хустачак. Да гэтага часу ўжо пашыта і перададзена Каменскаму дому-інтэрнату 750 адзінак швейных вырабаў. Каля пяцісот адзінак пасцельнай бялізны атрымала раённая бальніца, частка пашытых вырабаў пайшла на патрэбы мясцовых устаноў адукацыі і санаторнай школы.
Зараз запланаваныя аб’ёмы работ завяршаюць старшакласніцы СШ №1 райцэнтра. Нямногім больш як за месяц, без адрыву ад вучобы, яны пашылі 64 дзіцячыя камплекты пасцельнай бялізны (па 4 прадметы кожны), больш за 90 ручнікоў, 320 хусцінак, амаль 600 прасцін, 50 навалачак, дашываюць рукавіцы (100 пар). Да другаснай занятасці ў школе ў гэтым годзе было прыцягнута 60 вучаніц з 8 па 10 класы, імі асвоена 9 мільёнаў 870 тысяч рублёў, а пашытыя рэчы будуць адпраўлены ў Веснаўскі дом-інтэрнат і перададзены раённаму цэнтру сацыяльнага абслугоўвання насельніцтва, дзіцячыя камплекты пойдуць для патрэб сваёй школы.
Усяго ж у Глуску на пашыве вырабаў вясной, летам і восенню на базе санаторнай, першай і другой школ, а таксама Цэнтра творчасці працавалі 210 мясцовых школьніц. Як паведамілі нам у службе занятасці ўпраўлення па працы, занятасці і сацыяльнай абароне насельніцтва, з агульнай сумы, асвоенай імі, на заработную плату пайшло 39 мільёнаў 623 тысячы рублёў.

Т.ЛУГАВАЯ
Фота аўтара