Час ляціць вельмі хутка. Вось, здавалася, зусім нядаўна ездзілі віншаваць ветэрана Вялікай Айчыннай вайны Яўгена Цімафеевіча Шылава з 90-годдзем, а сяголета ён адзначыў наступны юбілей — 95-ы дзень нараджэння.

Павіншаваць юбіляра з такой значнай у жыцці датай прыехалі да яго ў Завалочыцы намеснік старшыні Глускага райвыканкама Анатоль Ласоцкі, старшыня раённага савета ветэранаў Тамара Толсцік, начальнік аддзела ідэалагічнай работы, культуры і па справах моладзі Алена Самуйлік, начальнік упраўлення па працы, занятасці i сацыяльнай абароне Алена Кірэй, старшыня Завалочыцкага сельвыканкама Дзмітрый Асадчы.

Анатоль Ласоцкі зачытаў для ветэрана віншаванне ад старшыні Глускага райвыканкама Сцяпана Чачухі і пажадаў ад сябе асабіста моцнага здароўя, бадзёрасці. Госці далучыліся да віншаванняў і падкрэслілі, што Яўген Цімафеевіч і зараз для маладога пакалення прыклад аптымізму, стойкасці, жыццёвай мудрасці, пажадалі яму такім жа заставацца.

В. ЯНУШЭЎСКАЯ

Фота аўтара