А дванаццатай гадзіне 1 мая каля раённага Дома культуры было вельмі мнагалюдна. Так глушчане адгукнуліся на ініцыятыву раённага аб’яднання прафсаюзаў правесці ў Глуску на  Свята працы велапрабег. Прыемна ўразіла тое, што да месца збору прыехалі не толькі людзі працуючыя, але і вольныя пенсіянеры і нават былыя глушчане з мінскай, гомельскай, бабруйскай прапіскай. (Паштурхаўшыся паміж людзьмі, пачула назвы гэтых гарадоў і тое, што даведаліся прыезджыя пра гэты велапрабег ад сяброў і сваякоў і вырашылі далучыцца: гараджане больш лёгкія на пад’ём і больш ахвочыя да такіх ініцыятыў, чым нашы местачкоўцы.) Яшчэ прыемна было бачыць, што з бацькамі, бабулямі і дзядулямі былі іх дзеці і ўнукі, а некаторыя выбраліся цэлымі сем’ямі.

Мяркуючы па ўсмешках, па масавым і персанальным фатагра-фаванні і сэлфі, настрой ва ўсіх быў добры. У падмогу гэтаму была і атрыбутыка свята: флажкі Федэрацыі прафсаюзаў Беларусі, грамадскіх аб’яднанняў БРСМ і “Белая Русь”. Пасля інструктажу па тэхніцы бяспекі, які правёў старшыня райаб’яднання прафсаюзаў Аляксандр Леўчанка, уся гэта вялікая, стракатая, вясёлая і рознаўзроставая калона дружна рушыла згодна з вызначаным маршрутам…

Скажу як чалавек, які сам пракруціў педалі ўсе гэтыя пяць кіламетраў: гэта было цудоўна, здорава, весела і зусім няцяжка. А яшчэ бяспечна, што немалаважна: спераду машына Дзяр-жаўтаінспекцыі, ззаду “хуткая”, на ўсіх перакрыжаваннях — міліцыя… А на фінішы, у цені цэнтральнага парку, якраз насупраць фантана, веласіпедыстаў чакалі абяцаныя пачастункі — мінеральная і пітная вада, сокі, яблыкі.

Ніхто не ставіў мэту падлічыць дакладную колькасць удзельнікаў першамайскага велапрабегу, але дакладна вядома, што было раздадзена 100 флажкоў, і іх атрымаў далёка не кожны веласіпедыст. Зрэшты, колькасць тут не галоўнае, галоўнае — арганізацыя і настрой, а яны былі добрымі. Думаю, ніхто не пашкадаваў, што праехаў 1 мая ў веласіпеднай калоне.

 Тым больш што ў гэты дзень цікавага адбывалася яшчэ шмат чаго ў парку і вакол яго: разнастайныя атракцыёны для дзяцей, чытальня пад адкрытым небам, куды з цікавасцю заходзілі малыя і дарослыя, і прыгожы канцэрт ад раённага Дома культуры і школы мастацтваў, і гандлёвы кірмаш з рознымі таварамі і бяспройгрышнымі латарэямі, і футбол. Словам, у каго да чаго душа цягнулася, той туды і трапіў, тое і пабачыў. А мы зазірнулі ўсюды і вам пра тое напісалі.

Таццяна ЛУКАШЭВІЧ

Фота Ганны АЎТУХОВАЙ

Больш фота тут