“Рускай мове дай разгрузку — размаўляй па-беларуску”. Пад такім дэвізам 22 — 26 лютага ў Макавіцкай школе прайшоў тыдзень беларускай мовы. Вучні даведаліся, чаму ў 2000 годзе Юнеска абвясціла 21 лютага Міжнародным днём роднай мовы, здзейснілі цікавае падарожжа па краіне Мовазнавіі. Конкурсная праграма “Квітней, родная мова!” дала магчымасць яе ўдзельнікам папоўніць свае веды ў беларускай этнаграфіі.  Вучні “ладзілі” народныя святы, “прымяралі” нацыянальнае адзенне, “гатавалі” нацыянальныя  стравы. У час правядзення КВЗ “Сэрцам роднага слова краніся” дзеці спаборнічалі ў разгадванні анаграм, метаграм, рэбусаў, пабывалі ў каралеўстве крывых люстэркаў, вызначылі лепшых знаўцаў беларускай мовы. Каманды  лінгвістычнай гульні “Два караблі” пашырылі  свой кругагляд, узбагацілі мову фразеалагізмамі, папоўнілі лексіку словамі і тэрмінамі на марскую тэматыку. Наведвальнікі бібліятэкі знаёміліся з выставай “Беларускія аўтары-юбіляры”.

Арганізатар тыдня, настаўніца беларускай мовы і літаратуры Цэд Раіса Яўгенаўна, стварыла спрыяльныя ўмовы для развіцця творчых здольнасцей, цікавасці, кемлівасці вучняў. Мерапрыемствы мелі не толькі забаўляльны, але і пазнавальны характар.

 Алена Лазоўская,

намеснік дырэктара Макавіцкага НПК