Па-летняму цёплае надвор’е будзе ў беларусі ў выхадныя
Па-летняму цёплае надвор’е чакаецца ў Беларусі ў выхадныя, паведаміла галоўны сіноптык службы гідраметэаралагічных прагнозаў Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды Святлана Рыбакова.
“Лета не спяшаецца развітвацца з намі. І хоць восень ужо нагадвае аб сабе халаднаватымі начамі і ранішнімі туманамі, верасень яшчэ парадуе нас па-летняму цёплымі дзянькамі”, – падкрэсліла сіноптык.
У пятніцу, 9 верасня, умовы надвор’я на тэрыторыі Беларусі будзе вызначаць вобласць павышанага атмасфернага ціску. Пераважна без ападкаў. У начны і ранішні час у асобных раёнах магчымы туман. Тэмпература паветра ноччу складзе 8-13 градусаў, толькі па паўночным усходзе будзе плюс 5-7 градусаў. Днём чакаецца 17-23 цяпла, прычым халадней будзе на паўночным усходзе краіны, а па паўднёвым захадзе тэмпература дасягне 24-28 градусаў.
Надвор’е ў выхадныя будуць фарміраваць вобласць павышанага атмасфернага ціску і цёплыя паветраныя масы, якія паступаюць з паўднёвага захаду Еўропы. Чакаецца па-летняму цёплае надвор’е. Пры гэтым у сувязі з адсутнасцю ападкаў павялічваецца пажаранебяспека лясоў, асабліва ў паўднёвых раёнах краіны. У суботу без ападкаў. Ноччу і раніцай у асобных раёнах згусціцца туман. Тэмпература паветра ноччу складзе 7-14, у паўночна-ўсходніх раёнах плюс 4-6 градусаў. Днём чакаецца 20-27, па паўднёвым захадзе паветра прагрэецца да 29 градусаў. У нядзелю таксама без ападкаў. Ноччу і раніцай месцамі магчымы туман. Ночы стануць цяплейшымі, тэмпература паветра не апусціцца ніжэй за 9-16 градусаў, у дзённы час тэмпература дасягне адзнак 22-29 градусаў.
Да сярэдзіны наступнага тыдня захаваецца вельмі цёплае надвор’е. Будзе пераважна без ападкаў, толькі ў панядзелак, 12 верасня, днём месцамі па паўночнай палавіне краіны пройдуць кароткачасовыя дажджы. Тэмпература паветра ў начны час складзе 10-16, днём чакаецца 22-28, па паўднёвым захадзе паветра прагрэецца да 30 градусаў.